हरिदेवी कोइराला संगीत सम्मान राष्ट्रिय पुरस्कार–२०७५ बाट अग्रज लोकगायक खिमबहादुर गन्धर्व सम्मानित भएका छन्।

हरिदेवी कोइराला साहित्य संगीत सम्मानकोष पोखराले आइतबार एक समारोहबीच नगद १५ हजार राशिसहित सम्मान पत्र र दोसल्ला प्रदान गरी गन्धर्वलाई सम्मान गरेको हो। कोषका संरक्षक हरिदेवी कोइराला, गायिका बाबा राणा, कोषका अध्यक्ष कृष्णप्रसाद बास्तोला र अली मियाँ लोक वाङ्मय प्रतिष्ठानका अध्यक्ष हनिफ मियाँले संयुक्त रुपमा सम्मान अर्पण गरेका थिए।

त्यस अघि साहित्यकार ताराप्रसाद तिमिल्सिनाले सम्मानित प्रतिभाको परिचय प्रस्तुत गर्दै सात वर्षको उमेरदेखि सारङ्गी बजाउन सुरु गरेका गन्धर्वको नेपाली लोक संगीत क्षेत्रमा सात दशक लामो योगदान रहेको उल्लेख गरे।