पोखरा, १७ चैत। रामेश्वरी माध्यमिक विद्यालय पोखरा–१४, मझेरीपाटनको ५४औं वार्षिकोत्सव एवम् पुरस्कार वितरण समारोह सम्पन्न भएको छ।

समारोह उद्घाटन प्रमुख अतिथि पूर्व स्वास्थ्यमन्त्री एवं प्रतिनिधिसभा सदस्य खगराज अधिकारीले गरेका थिए। उनले विद्यालयको कम्प्युटर शिक्षालाई सहयोग पुर्याउन आवश्यक कम्प्युटर सहयोग गर्ने प्रतिबद्धता गरे।

कार्यक्रममा जिल्ला समन्वय समिति अध्यक्ष बैनबहादुर क्षेत्री अधिकारी, पूर्व सभासद तेजकुमारी पौडेल र चूडामणि जंगलीले विद्यालयको लागि आफूहरूले सक्दो सहयोग पुर्याउने प्रतिबद्धता व्यक्त गरे।

कार्यक्रममा भयरीश्वरी आधारभूत विद्यालय व्यवस्थापन समिति अध्यक्ष जंगबहादुर कुँवर, शुक्रराज बलभद्र मावि व्यवस्थापन समितिका नवनिर्वाचित अध्यक्ष रोमबहादुर कार्की, समाजसेवी जेबी कुँवर र नि.वर्तमान अध्यक्ष क्षेत्रबहादुर कुँवरले शुभकामना मन्तव्य राखेका थिए।

विद्यालयले शिक्षाप्रेमीद्वारा स्थापित अक्षयकोषबाट अक्षयकोष संस्थापक जेबी कुवँर, उमा पन्थी, खीमबहादुर कार्की, होमबहादुर कार्की, ललित कार्की, मीनबहादुर केसी, पूर्व एसएसपी कृष्ण थापाले गरीब तथा जेहेन्दार विद्यार्थीलाई छात्रवृत्ति वितरण गरे।

विद्यालय व्यवस्थापन समिति अध्यक्ष रामजीप्रसाद ज्ञवालीको अध्यक्षतामा भएको कार्यक्रममा विद्यालयको विविध शैक्षिक एवम् अतिरिक्त क्रियाकलापको पुरस्कार वितरण गरिएको थियो।

कार्यक्रममा विद्यालय प्रअ तुलसीप्रसाद चापागाईंले विद्यालयको शैक्षिक एवम् आर्थिक प्रतिवेदन पेश गरेका थिए भने सञ्चालन शिक्षक कमलराज ढुंगानाले गरेका थिए।

सो अवसरमा विद्यार्थीले सांस्कृतिक कार्यक्रम प्रस्तुत गरेका थिए।