पोखरा, १५ चैत । पोखराको पृथ्वीनारायण क्याम्पसमा अध्ययन गरेका पूर्वविद्यार्थी समूह हङकङले क्याम्पसका पूर्वविद्यार्थी पदमबहादुर नेपालीलाई १ लाख ८५ हजार रुपैया सहयोग प्रदान गरेको छ ।

हङकङमा कार्यरत पूर्व विद्यार्थीबाट संकलित उक्त रकम पृथ्वीनारायण क्याम्पस स्ववियु पूर्व सभापति एवं प्रतिनिधि सभाका सदस्य पदम गिरी, प्रदेश सभा सदस्य मीना गुरुङ र हङकङमा कार्यरत पृथ्वीनारायण क्याम्पस स्ववियु पूुर्व कोषाध्यक्ष विरोध विक्रम गुरुङले रक्तचापबाट अस्वस्थ्य एवं भूकम्प पीडित पिएनका पूर्व विद्यार्थी पदम बहादुर नेपालीलाई उक्त रकम सहयोग हस्तान्तरण गरेका हुन् ।

पृथ्वीनारायण क्याम्पसमा अध्ययनरत कुनै पनि समस्यामा परेका विद्यार्थीका लागि सहयोग पुर्याउनका लागि स्थापना गरेको अ ड्रप अफ स्माइल(ए डि एस) पिएन क्याम्पस ग्रुपको अभियान अन्र्तगत हङकङमा कार्यरत पिएनका पूर्व विद्यार्थीको तर्फबाट सहयोग गरेको विरोध विक्रम गुरुङले बताए ।

पूर्व विद्यार्थीको तर्फबाट यस क्षेत्रको समृद्धिको लागि के गर्न सकिन्छ भन्ने छलफलमा रहेको बताए । २०४१÷२०४२ सालमा पृथ्वीनारायण क्याम्पसमा भर्नाभई अखिलको साँस्कृतिक समूहमा समेत आवद्ध भई साँस्कृतिक क्षेत्रमा विशेष भूमिका निभाएका पदम बहादुर नेपाली ६ वर्ष अघि रक्तचापका कारण अस्वस्थ्य भई १८ दिनसम्म सघन उपचारकक्षमा अचेत अवस्थामा उपचार भएको थियो ।

आर्थिक अवस्था कमजोर रहेको नेपालीले उक्त उपचारबाट नयाँजीवन पाउन सफल भए पनि शारिरीक अस्वस्थ्यता र तनहँु शुक्ला गण्डकी नगरपालिका, ढोरफिर्दीस्थित घर भूकम्पले भत्काइदिए पछि घरबास विहिन बन्न पुगेका छन् ।
उक्त कार्यक्रमका सहभागी अनेरास्ववियु कास्कीका अध्यक्ष विवेक देवकोटाले समस्यामा परेका पदम नेपालीको घर निर्माण गर्दा अखिलले श्रमदान गर्ने बताए ।