पोखरा–१३ चैत । पर्यटकको थप आर्कषण बढाउन महेन्द्रगुफा र चमेरे गुफामा कार्यरत कर्मचारीलाई पर्यटन र आतिथ्य सत्कारका विषयमा प्रशिक्षण दिइएको छ ।

विन्ध्यवासिनी माविले आयोजना गरेको अभिमुखीकरण कार्यक्रममा नेपाल पर्यटन बोर्ड, गण्डकी प्रदेशका प्रमुख मणिराज लामिछानेले पर्यटन व्यवस्थापनका विषयमा सहजीकरण गर्दै विभिन्न माध्यमबाट पर्यटकीय क्षेत्रको प्रचार प्रसार गर्न सुझाव दिए ।

पर्यटकको सही व्यवस्थापन गर्न र पर्यटकीय क्षेत्रमा थप आर्कषण बढाउनु पर्ने बताए ।बोर्डका पूर्व केन्दी्रय सदस्य टिकाराम सापकोटाले पर्यटन क्षेत्र र पर्यटकका विषयमा सहजीकरण गरे । ।उनले सन् १९९० पछिमात्र पोखरामा पर्यटनले व्यवसायिक रुप लिएको बताउँदै यसको दिगो व्यवस्थापन आवश्यक रहेकोमा जोड दिए ।

यसअघि कार्यक्रमको उद्घाटन गर्दै पोखरा महानगरपालिका वडा नं. १६ का वडाध्यक्ष जीवनप्रसाद आचार्यले अरु क्षेत्र भन्दा पर्यटन क्षेत्र विशेष किसिमको भएको हुँदा, त्यस क्षेत्रका व्यक्तिको व्यवहार विशिष्ट हुनुपर्ने बताए ।

कृषिविज्ञ वेनी ब. वस्नेत, विद्यालय व्यवस्थापन समितिका अध्यक्ष चन्द्रा थापा,प्रधानाध्यापक कृष्णप्रसाद आचार्य लगायतकाले यस्ता कार्यक्रमले कर्मचारीमा क्षमता अभिवृद्धि हुने विश्वास व्यक्त गरे ।

कार्यक्रममा सहभागीहरुले बेलाबेलामा कर्मचारीलाई अन्य पर्यटकीय क्षेत्रको अवलोकन गराउनु पर्ने र सेवा सुविधामा ध्यान दिनुपर्ने बताएका थिए । अभिमुखीकरण कार्यक्रममा दुवै गुफामा कार्यरत १३ जना कर्मचारीको सहभागिता रहेको थियो ।