लमजुङ, ११ चैत । लमजुङको राइनास नगरपालिकाद्वारा चालु आवमा ५० लाख ६४ हजार राजस्व संकलन गरिएको छ । यो रकम गत आवको यसै अवधिको तुलनामा १२ लाखले बढी हो ।

चालु आव २०७५÷७६ को फागुन मसान्तसम्मको अवधिमा कूल ५० लाख ६४ हजार पाँच सय ८१ रुपैयाँ राजस्व संकलन गरिएको राइनास नगरपालिकाका मेयर सिंहबहादुर थापाले बताए । उनका अनुसार चालु आवमा ९२ लाख राजस्व संकलनको लक्ष्य राखिएको छ । हालसम्म ५५ प्रतिशत प्रगति देखिएको छ । यो वर्ष हामी लक्ष्य हासिल गर्न सक्छौं भन्ने लागेको थापाले बताए ।

गत आव २०७४÷७५ को अवधिमा ४४ लाख ७५ हजार राजस्व संकलनको लक्ष्य राखिएकोमा वर्षभरमा जम्मा ४४ लाख मात्र राजस्व संकलन हुन सकेको नगरपालिकाका उपमेयर धनकुमारी गुरुङले बताइन् । उनका अनुसार गत आवको फागुन मसान्तसम्ममा ३८ लाख ७३ हजार ६९ रुपैयाँ राजस्व संकलन भएको थियो । पहिलो वर्ष भइको हुँदा अनुभवको पनि कमी रह्यो यो वर्षको लक्ष्य पुरा गर्न सक्छौं भन्ने आजसम्मका गतिविधिबाट विश्वास जागेको उनको भनाई छ ।