देशको मध्यभागबाट सम्बृद्धिको ढोका खुल्यो – प्रधानमन्त्री

Avatar आदर्श समाज सम्वाददाता
चैत्र ८, २०७५

बुटवल ८ चैत्र । प्रधानमन्त्री केपी शर्मा ओलीले देशको मध्यमागबाट संम्बृद्धिको शुरुवात भएको बताएका छन् ।

उनले पूर्वपश्चिम राजमार्गको विस्तारसंगै रेलमार्गको निमार्णलाई पनि तीव्रता दिने बताए । उनले मध्य नेपालबाट देशको पूर्व र पश्चिम तर्फ सडक र रेल दुवै निमार्णको थालनी भएको दावी पनि गरे ।

रूपन्देहीको तिलोत्तमामा निर्माण हुने सरकारी मेडिकल कलेजको कार्यालय शुभारम्भ तथा पूर्व पश्चिम राजमार्ग अन्तरगत बुटवल नारायणगढ सडक विस्तार आयोजनाको शिलन्याश गर्दै यस्तो बताएका हुन् ।

प्रधानमन्त्रीले अव देशका नागरिकले रोगी भएर बस्न नपर्ने र पुर्वाधार विकास नभएको गुनासो गर्न नपर्ने पनि बताए । कार्यालय शुभारम्भ पछि आयोजित सभालाई सम्बोधन गर्दै प्रधानमन्त्री ओलीले मेडिकल कलेज स्थापना पछि यस क्षेत्रका प्रतिभाशाली विद्यार्थीले यहीबाट स्तरीय मेडिकल शिक्षा हासिल गर्ने बताए ।

प्रधानमन्त्री ओलीले शान्ति क्षेत्रका रुपमा परिचित लुम्बिनीबाट देशको सम्बृद्धिको कार्य थालनी भएको पनि बताए । उनले अन्तराष्ट्रिय विमानस्थलका अन्तिम चरणमा रहेको र अव वर्षमा लुम्बिनीमा २० लाख पर्यटक आउने आश्वासन दिए ।
देश विकास र सुशासनको वाटोमा अघि बढेकोले अब कसैले बम पड्काउने काम पनि सरकारलाई मान्य नहुने प्रधानमन्त्रीको भनाई छ । कार्यक्रममा बोल्दै नेकपाका महासचिव विष्णु पौडेलले प्रधानमन्त्री ओलीकोको नेतृत्वमा देशको सम्बृद्धि शुरु भएको र अव प्रतिपक्षी दलहरुसग पनि सहकार्य हुने बताए ।

प्रदेशका मुख्यमन्त्री शंकर पोख्रेलले शुरुमा प्रधानमन्त्रीका विकास र योजनाका कुरालाई हवामा उडाएर मजाक गर्नेहरुलाई अहिले तथ्याङक पेश गरेपछि जवाफ मिलेको बताए ।

बुटवल मेडिकल कलेजले उत्साह

बुटवल मेडिकल कलेज रूपन्देहीको तिलोत्तमा नगरपालिका वडा नं १ र ८ मा रहेको सरकारी जग्गामा निर्माण हुने छ । उक्त मेडिकल कलेजका वन क्षेत्र अन्तर्गतको झण्डै २ सय बिघा जमीनको स्वामित्व मेडिकल कलेजका नाममा हस्तान्तरण भइसकेको छ।

हरेक प्रदेशमा एउटा सरकारी मेडिकल कलेज राख्ने सरकारको नीति अनुसार तिलोत्तमामा प्रदेश ५ स्तरीय मेडिकल कलेज स्थापना हुन लागेको हो।

स्थापना हुने कार्यालयले मेडिकल कलेज स्थापनाका लागि इआइए, गुरूयोजना निर्माणलगायतका कामहरु गर्नेछ ।
३ सय शैय्याको अस्पताल सहितको कलेज निर्माणमा करिब १० अर्ब खर्च लाग्ने अनुमान गरिएको छ।

सुरूमा एमबिबिएस तहको अध्ययन अध्यापन हुने मेडिकल कलेजको अस्पताललाई तीन वर्षसम्म सञ्चालन गरिने र अस्पताल सञ्चालन भए पछि मात्र एमबिबिएस पढ्ने विद्यार्थीको भर्ना लिइने छ।

बुटवल नारायणगढको समय छोटिने

पूर्वपश्चिम राजमार्गको बुटवल–नारायणगढ खण्ड चार लेन बनाउन प्रधानमन्त्री केपी ओलीले शिलान्यास गरे । भौतिक पूर्वाधार तथा यातायात मन्त्रालयले २०७२ सालमा तयार पारेको रणनीतिक योजना २०७३–०७८ अनुसार पूर्वपश्चिम राजमार्ग चार लेनको बनाइनेछ ।

बुटवल–नारायणगढ सडकको १ सय १३ किलोमिटर सडक ३ वर्ष्भित्र चार लेनको बनाउने आयोजनाका पश्चिम खण्ड प्रमुख सुरेश न्यौपानेले जानकारी दिए । उक्त सडक विस्तार भएपछि यात्रा दूरी अहिलेकोबाट झण्डै आधा घट्ने छ । बुटवलबाट नारायणगढसम्मको दूरी पार गर्न अहिले करीव तीन घण्टा लाग्छ । उक्त सडकको स्तरोन्नति भई चार लेन बनेपछि कम्तीमा १ घण्टा ३० देखि एक घण्टा ५० मिनेटभित्रै छिचोल्न सकिने छ ।

एशियाली विकास बैंकको सहुलियतपूर्ण ऋण ८५ प्रतिशत र नेपाल सरकारको १५ प्रतिशत लगानीमा झण्डै रु १७ अर्बको लागतमा सडक स्तरोन्नतिको काम हुनेछ । यसका लागि सडक विभागअन्तर्गतको एडिबी सडक निर्देशनालयले सडक स्तरोन्नतिका लागि कम रकम कबोल गर्ने चाइना स्टेट कन्स्ट्रक्सन कम्पनीसँग सम्झौता गरेर काम अघि बढाएको छ ।

बुटवल–नारायणगढ सडक स्तरोन्नतिको काम दुई खण्डमा हुनेछ । पहिलो खण्डमा पूर्वी नवलपुरको गैंडाकोटदेखि दाउन्नेसम्मको ६५ किलोमिटर र दोस्रोमा दाउन्नेदेखि बुटवल राजमार्ग चौराहासम्मको ४८ किलोमिटरको काम हुनेछ । पहिलो खण्डका लागि निर्माण कम्पनीले रु ९ अर्ब १३ करोड रुपैयाँ र दोस्रो खण्डका लागि पनि सोही कम्पनीले रु ७ अर्ब ८६ करोड रुपैयाँको आर्थिक प्रस्ताव गरेअनुसार सम्झौता सम्पन्न भएको इन्जिनीयर न्यौपानेले बताए ।

तपाइको विचार व्यक्त गर्नुहोस्

प्रमुख समाचार

एसइईको परीक्षाफल असार १५ गतेसम्म आउन सक्ने