पोखरा, ४ चैत । कास्कीमा पनि बर्डफ्लुको संक्रमण देखिएको छ ।

मादी गाउँपालिका–३ की याङ्जाकोटमा सन्तुदेवी परियारले पालेका कुखुरामा बर्डफ्लु देखिएको हो । खोरमा रहेका कुखुरा मर्न थालेपछि परीक्षणका लागि उनले पोखरा ल्याएकी थिइन् ।

पोखराबाट काठमाडौं परीक्षणका लागि पठाउँदा बर्डफ्लु देखिएको भेटेरीनरी अस्पताल पशु सेवा केन्द्रका पशु विकास अधिकृत सहदेव पौडेलले जानकारी दिए । बर्डफ्लू प्रमाणित भएपछि कार्यालयले त्यस क्षेत्रका कुखुरा मार्न शुरु गरेको छ ।

कुखुराको संख्याबारे एकिन नभएको उनले बताए । परियारले पालेका लोकल र गिरिराज कुखुरामा बर्डफ्लु देखिएको थियो । बर्डफ्लु लागेको क्षेत्रमा चार किल्ला कायमगरी बर्डफ्लु संक्रमित कुखुरा नष्ट गरिएको छ भने सो क्षेत्रमा कुखुरा र दानाहरू आयात र निर्यात गर्न समेत रोक लगाइएको छ ।

प्रतिक्रिया