आगलागीपीडितलाई नगरको सहयोग

Avatar इन्द्रमणि पाण्डे, विद्यार्थी पत्रकार
चैत्र १, २०७५

बागलुङ, ३० फागुन। बागलुङको ढोरपाटन–९, ढोरनवी गाउँका अग्निपीडितको घर पुनःनिर्माणका लागि पहिलो किस्ता वापतको राहत रकम उपलब्ध भएको छ। नगरपालिकाले १ लाख रुपैयाँ राहत रकममध्येबाट पहिलो किस्तास्वरुप प्रतिघरपरिवार २५ हजारका दरले रकम उपलब्ध गराइएको हो।

ढोरपाटन नगरकार्यपालिकाको कार्यालय बुर्तिवाङमा आयोजित कार्यक्रमबीच अग्निपीडितलाई पहिलो किस्ता रकमको चेक हस्तान्तरण गर्दै ढोरपाटन नगरपालिकाका नगर प्रमुख देवकुमार नेपालीले सो रकमबाट घर निर्माण गरी रकमको सही सदुपयोग हुने कुरामा विश्वस्त रहेको बताए। उनले आगलागीपीडित सबैको घर एकै किसिमको निर्माण गरी नमूना बस्ती निर्माण गर्ने योजना नगरपालिकाले बनाएको जानकारी दिए। दोस्रो किस्तावापत ७५ हजार रुपैयाँ पछि उपलब्ध गराइने नगर प्रमुख नेपालीले जानकारी दिए। पीडितहरुको घर पुनःनिर्माण सम्पन्न हुने चरणमा घर छाउन आफूले व्यक्तिगत रुपमा राम्रो र बलियो जस्ता पाता उपलब्ध गराउने नगरप्रमुख नेपालीले वचनबद्धता दोहोराए। सो अवसरमा उनले घर पुननिर्माण सम्पन्न भए पश्चात प्रत्येक घरमा नगरपालिकाबाट सोलार बत्तिको व्यवस्था समेत गरिदिने प्रतिबद्धता जनाए।

गत मंसिर ९ गते सो गाउँमा भएको भीषण आगलागीबाट ४८ घर परिवार बसोबास गर्ने ३० घर जलेर नष्ट भएका थिए।

घरबास, लत्ता कपडा, अन्नपात जलेर नष्ट भएपछि कहाँ बस्ने र परिवार कसरी पाल्ने भन्ने समस्या परेको बेला नगरपालिकाले दिएको सहयोगले निकै राहत मिलेको अग्निपीडित सोमला विश्वकर्माले बताए। राहत रकम वितरण कार्यक्रममा वडा १ का अध्यक्ष चित्रबहादुर भण्डारी, नगरपालिकाका इञ्जिनियर नारायण पौडेल, सूचना अधिकृत हरिस भण्डारी लगायत बोलेका थिए।

तपाइको विचार व्यक्त गर्नुहोस्

प्रमुख समाचार

टीभीएस अपाचे पोखरा स्पोर्टस् अवार्ड मनोनयन सार्वजनिक