पोखरा, २८ फागुन । भक्तपुरबाट हेटौंडामा बेहुली लिन पुगेको जन्तीबस दुर्घटना हुँदा बसमा यात्रा गरेका २ जनाको घटनास्थलमा नै मृत्यु भएको छ ।

दुर्घटनामा १७ जना घाइते भएका छन्, घाइतेमध्ये ५ जनाको अवस्था गम्भीर रहेको जानकारी प्रहरीले दिएको छ । भक्तपुरबाट जन्ती लिएर हेटौंडातर्फ जादै गरेको बा.४ख २२१७ नम्बरको बस कान्ति लोकमार्ग अन्तर्गत मकवानपुरको गढी गाउँपालिका–२ चैनपुर डाँडामा दुर्घटना भएको हो । उक्त बस सडकबाट २० मिटर तल खसेको थियो ।

दुर्घटनामा परी मृत्यु हुनेमा काभ्रेजिल्ला ज्याम्दी घर भई भक्तपुर बस्ने ३० वर्षीय नवराज परियार र नुवाकोट घर भई बालाजु बस्ने २१ वर्षीय विकास धमला रहेको जिल्ला प्रहरी कार्यालय मकवानपुरले जानकारी दिएको छ ।

दुर्घटनाको खबर पाउनेवित्तिकै प्रनाउ भट्टराई सहितको टोली घटनास्थल पुगेको थियो। घाइतेहरुको हेटौंडाको हेटौंडा अस्पताल र चुरे हिल अस्पतालमा उपचार भइरहेको छ।