पोखरा, १७ फागुन । हेलिकप्टर दुर्घटनामा परी निधन भएका संस्कृति, पर्यटन तथा नागरिक उड्डयनमन्त्री रवीन्द्र अधिकारीको शुक्रवार पोखराको रामघाट स्थित सेती नदीमा अन्त्येष्टि गरिएको छ ।

उनको पार्थिव शरिरमा छोराहरु विराज, स्वराज र रवीन्द्रकी पत्नी विद्याले दागवत्ति दिएका थिए । काठमाण्डौवाट शुक्रवार दिउसो एक वजे जहाजमा पोखरा रवीन्द्र अधिकारीको शव पोखरा ल्याइएको थियो । पोखरा विमानस्थलवाट सीधै नयाँ वजार स्थित पर्दशनी केन्द्रमा अन्तिम श्रद्धाञ्जलीका लागि उनको शव राखिएको थियो ।

प्रदर्शनी केन्द्रमा श्रद्धाञ्जलि अर्पण गर्न दलका नेता, उच्च पदस्थ कर्मचारी तथा सर्वसाधारणको भीड लागेको थियो । प्रदर्शनी केन्द्रमा अन्तिम श्रद्धाञ्जलि दिदैै नेकपामा उपाध्यक्ष वामदेव गौतम र नारायणकाजी श्रेष्ठले पार्टीको झण्डा ओढाएका थिए भने उपप्रधान तथा रक्षामन्त्री ईश्वर पोखरेलले र गण्डकी प्रदेशको मुख्यमन्त्री पृथ्वीसुब्वा गुरुङले राष्ट्रिय झण्डा ओढाएका थिए ।

सर्वसाधारणले श्रद्धाञ्जलि अर्पण गरेपछि मन्त्री अधिकारीको शव दिउसो ४.०० वजे पोखरा प्रदर्शनी केन्द्रवाट पोखरा परिक्रमा गदै नयाँवजार, महेन्द्रपुल, रानीपौवा, अस्पताल चोक हुदै अन्त्येष्टिका लागि रामघाट स्थित सेती नदीमा लगिएको थियो । अधिकारीको अन्त्येष्टिमा राजकीय सम्मान स्वरुप नेपाली सेनाले सलामी अर्पण गरेको थियो । अधिकारीको शव यात्रामा दशौ हजारको संख्यामा कस्केली समुदाय सहभागी वनेका थिए । शव यात्रामा विभिन्न दलका नेता तथा कार्यकर्ता सहभागी थिए ।

अधिकारीलाई श्रद्धाञ्जलि दिन र अन्त्येष्टिमा पुगेका सर्वसाधारणको आँखावाट आँसु झरेको थियो । अधिकारीलाई अन्तिम श्रद्धाञ्जलि दिन नेकपा नेता वामदेव गौतम, ईश्वर पोखरेल, नारायणकाजी मन्त्रीहरु श्रेष्ठ, गोकर्ण विष्ट, पद्मा अर्याल, गण्डकी प्रदेशका मुख्यमन्त्री पृथ्वीसुब्वा गुरुङ, मन्त्रीहरु, प्रतिनिधि सभा सदस्य तथा प्रदेश सभा सदस्य र विभिन्न राजनीतिबक दलका नेता पोखार आएका थिए ।

अन्तिम श्रद्धाञ्जलि दिन रवीन्द्रका बुवा इन्द्रप्रसाद अधिकारी, आमा लक्ष्मी अधिकारी, पत्नी विद्या अधिकारी प्रदर्शनी केन्द्रमा पुगेका थिए । अन्त्यष्टिमा पुगेका प्रतिनिधि सभा निर्वाचनमा रवीन्द्र अधिकारीसँगै प्रतिस्पर्धा गरेका नेपाली काँग्रेसका नेता देवराज चालिसेले कास्कीले एक दुरदर्शी नेता गुमाउनु पर्दा अत्यन्तै दुःख लागेको वताएका छन् ।
कास्कीको पोखरा महानगरपालिका–३३ भरतपोखरीको जामुनाबोटमा जन्मिएका स्व अधिकारी कास्की क्षेत्र नं २ बाट प्रतिनिधिसभामा निवाचित भएका थिए ।