आर्मीका लागि गोल गरेपछि सेलिब्रेसन गर्दै नवयुग श्रेष्ठ । तस्वीर : सुदर्शन रञ्जित

पोखरा, १२ फागुन । १७ औं आहा रारा गोल्कडपको आइतबारको खेलमा झण्डै हार नजिक पुगेको त्रिभुवन आर्मी क्लबले २० मिनेटमा लगातार ३ गोल गर्दै लोभलाग्दो प्रदर्शन गर्यो ।

हिमालयन शेर्पा क्लबसँग दोस्रो क्वाटरफाइनलमा सुरुवातदेखि नै उत्कृष्ट खेल पस्केको आर्मीले खेलको ७१ औं मिनेटमा मात्र बराबरी खेलेको थियो । अन्ततः नवयुग श्रेष्ठ चम्किदाँ ३–१ गोलअन्तरले हिमालयनको यात्रा टुंग्याउँदै आर्मी सेमिफाइनल पुग्यो । उत्कृष्ट कमब्याक गरेको आर्मीको लागि नवयुगले २ र जर्ज प्रिन्स कार्कीले १ गोलको योगदान दिए । प्रतियोगितामा नवयुग नै म्यान अफ दी म्याच बने । यसपालि पहिलो रोजाईका खेलाडी लिएर मैदान उत्रिएको उपाधि दाबेदार आर्मीले विजयी यात्रा सुरुवात गरेको हो । दुई साताअघि मनकामना केबुलकार पोखरा कप फुटबलमा क्यामरुनको डफिन्स टिम फेमेली फुटबल क्लबसँग उसको दोस्रो रोजगाइको टिम शुन्यविरुद्ध ४ गोलअन्तरले वाटरफाइनलबाट पाखा लागेको थियो । हिमालयन भने पोखरा कपको उद्घाटनमै एपीएफसँग पराजित भएको थियो ।

आर्मीले यस सिजनमा २ उपाधि भित्राइसकेको छ । इटहरीको मदन भण्डारी मेमोरियल गोल्डकप र वीरगञ्जको विशाल मेमोरियल गोल्डकपको उपाधि विजेता आर्मीले सिमरा गोल्डकपको फाइनलमा भने थ्रीस्टारलाई उपाधि सुम्पेको थियो । आर्मीले विशाल मेमोरियलमा हिमालयनलाई फाइनलमा सडनडेथको शिकार बनाएकोमा आहा रारामा भने अन्तिम समयमा सम्हालिन नसक्दा हिमालयनको लागि बदला लिने मौका चुक्यो ।

खेलको २७ औं मिनेटमा विपक्षीको गोलबाट आर्मी पछि परेको थियो । हिमालयन शेर्पाका लागि विदेशी खेलाडी प्याट्रिक प्राइभट गोहाले गोल गर्दै टिमलाई अग्रता दिलाए । त्रिदेव गुरुङको पासमा डि–बक्समा रहेका गोहाले सेकेण्ड बार च्याप्दै हानेको बलले सिधैँ जाली चुमेको थियो । पहिलो हाफ १–० मै टुंगिए पनि दोस्रो हाफमा आर्मीले विपक्षीलाई पूरै दबाबमा राख्यो ।

चिसो–चिसो मौसमबीच तात्तिएको खेलमा खेल सकिन २० मिनेट बाँकी रहँदा नवयुगले गोलको खडेरी तोडे । सन्तोष तामाङको लङ फ्रि किकलाई डि–बक्समा रहेका नवयुगले हेडमार्फत गोल गरेका हुन् । ८० मिनेटमा उनैले सेन्टर एरियाबाट लगेको बललाई जाली चुमाउँदै जित सुनिश्चित पारे । विदेशी खेलाडी युल्रिच सीवीबाट डिफ्लेक्ट भएको बल नवयुगले एक्लै अघि बढाउँदै विपक्षी पोष्टमा कडा प्रहार गर्दा जितको सञ्चार हुन पुगेको थियो ।

त्यस्तै, दोस्रो हाफको इञ्जुरी टाइमको पहिलो मिनेटमा आर्मीले गोलअन्तर बढायो । जर्ज प्रिन्स कार्कीले गरेको पहिलो प्रहार कीपर किशोर गिरीले पञ्च गरी जोगाउन खोज्दा रिबाउण्ड बल डिबक्स लाइनमै रहेका कार्कीको दोस्रो प्रहारले गोलपोष्टको फ्रेम लिन पुग्यो । ६५ औं मिनेटमा प्रशिक्षक नवीन न्यौपानेले टंक बस्नेतको ठाउँमा कार्कीलाई छिराएपछि आर्मीले लय समातेको थियो ।

हिमालयनको लागि गोलको खासै मुझ नभेटिँदा आर्मीले भने आधा दर्जन गोलका अवसर खेर फाल्यो । ६८ औं मिनेटमा नवयुगकोे क्रसबलमा प्रिन्सको हेड क्रसबार हुँदै बाहिरियो । १४ औं मिनेटमा सन्तोष तामाङले झण्डै सेन्टरबाट लगेको वान भसेर्स वान बल कीपरले क्लीयर गर्दा अग्रता लिने मौका गुम्यो । ३५ औ मिनेटमा सन्तोषले डिबक्स नजिकबाट गरेको कडा प्रहार विपक्षी रवी थापाले जोगाए । ३७ औं मिनेटमा टंक बस्नेतले वान भसेर्स वान बललाई सदपुयोग गर्न सकेनन् ।

भुटानमा खेलेर लामो यात्रामा आउँदा खेलाडी रेष्टमा नभएकोले पहिलो हाफ सोचेजस्तो हुन नसकेको आर्मीका प्रशिक्षक नवीन न्यौपानेले बताए । उनले पहिलो हाफमै दुईवटा वान भसेर्ज वान बल खेर गएपनि पछि लय समात्दा जित सम्भव भएको बताए । आफ्नो टिमको लागि पाएको बलमै काउन्टर आउँदा बलियो आर्मीसँग राम्रो खेल्दाखेल्दै पराजित हुनुपरेको हिमालयनका टिम म्यानेजर विजेन्द्र पुडासैनीले स्वीकारे । सोमबारको तेस्रो क्वाटरफाइनलमा युनाइटेड सिक्किम भारत र थ्रीस्टारबीच प्रतिष्पर्धा हुने आयोजक सहारा क्लब पोखराले जनाएको छ ।