काठमाडौं, १० फागुन । सांगठनिक एकता टुङ्गो लगाउन गठित नेकपाको कार्यदल शुक्रवार विहान भंग गरिएको छ ।

कार्यदल भंगसँगै अब शीर्ष नेताहरु रहेको सचिवालयले सांगठनिक एकताको प्रस्ताव तयार पारी स्थायी कमिटीमा पेश गर्ने बताइएको छ । प्रधानमन्त्री निवासमा बसेको सचिवालय बैठकले कार्यदलको समय थप नगरी भंग गरेको छ ।

नेकपाको विहीवार वसेको सचिवालय बैठकमा संयोजक रामबहादुर थापा बादलले पेश गरेको कार्यदलको प्रतिवेदनमा एक साताका लाथि थप समय माग गरिएको थियो । बैठकमा अधिकाशं कार्यदलका सदस्यले म्याद थप्नुपर्ने भनाई राखेका थिए ।

विहीवारको बैठकमा प्रधानमन्त्री एवं अध्यक्ष केपी शर्मा ओलीले कार्यदल विघटन गर्ने प्रस्ताव राखेका थिए। शुक्रबारको सचिवालय बैठकले ओलीकै प्रस्ताव अनुसार निर्णय गरेको छ । अब प्रस्ताव सचिवालयले तयार गर्ने र स्थायी समितिमा पेश गर्ने निर्णय भएको छ ।