प्राध्यापकले छ महिनादेखि तलब पाएनन

rss रासस
फागुन ५, २०७५


रोल्पा, ५ फागुन । रोल्पामा रहेको जलजला बहुमुखी क्याम्पसका प्राध्यापक कर्मचारीले लामो समयसम्म तलब नपाउँदा दैनिक जीवनयापन कठिन हुँदै गएको छ । त्रिभुवन विश्वविद्यालयको सम्बन्धनमा सञ्चालित सो क्याम्पसका १६ प्राध्यापक र चार कर्मचारीले गत भदौदेखि तलब पाएका छैनन् ।

छ महीना बित्दासम्म तलब नपाएका उनीहरुले दैनिक जीवनयापनमा समस्या हँुदै गएको गुनासो गर्न थालेका छन् । तलब नपाउँदा दैनिकी समस्याग्रस्त हुँदै जान थालेको छ सहप्राध्यापक दीपेन्द्र शाहीले बताए । “घरभाडा, रासनपानी तथा अन्य दैनिकी उधारोमा चलाएका छु”, शाहीले भनिन् “बिरामी पर्दा र चाडपर्वको बेला पैसाको बढी जरुरी पर्छ ।”

“खानपिन, छोराछोरी पढाउन र अन्य दैनिक जीवनयापनका लागि समस्या हँुदै आएको छ”, अर्का सहप्राध्यापक श्याम बुढाले भने समायोजन प्रक्रिया लम्बिँदा आफूहरुको दैनिकी चलाउन समस्या परेको उनको भनाई छ । अन्य साइड पेशा नभएकालाई थप समस्या हुने गरेको छ, बुढाले भने ।

क्याम्पस मध्यपश्चिमाञ्चल विश्वविद्यालयको आङ्गिकमा समायोजन भएकाले शिक्षक कर्मचारीलाई तलब भुक्तानीमा कठिनाइ भएको क्याम्पस प्रमुख विष्णुप्रसाद आचार्यले बताए । “समायोजन प्रक्रिया चलिरहेकाले तलब निकासा भएको छैन”, आचार्यले भने । “समायोजन प्रक्रिया टुङ्गिने बित्तिकै शिक्षक कर्मचारीको तलब भुक्तानी हुन्छ ।”

तीन सय बढी विद्यार्थी रहेको सो क्याम्पसमा त्रिभुवन विश्वविद्यालयको सम्बन्धनमा सञ्चालन हुँदा विद्यार्थी शुल्कको भरमा चलेको थियो । क्याम्पस अनुदान आयोगले दिने वार्षिक छ लाख मात्रै उपलब्ध गराउने गरेको क्याम्पसले जनाएको छ । विद्यार्थीबाट वार्षिक ५० लाख शुल्क उठ्दै आएको छ ।

क्याम्पसमा १५ सहप्राध्यापक, एक शिक्षण सहायक, एक लेखापाल, एक लाइवेरियन र दुई कार्यालय सहायक कार्यरत छन । विसं २०६१ मा स्थापना भएको सो क्याम्पसमा मानविकी, व्यवस्थापन र शिक्षा शास्त्रमा स्नातकतहसम्मको पठनपाठन हुँदै आएको छ ।

Comments on प्राध्यापकले छ महिनादेखि तलब पाएनन

प्रमुख समाचार

मातृभूमी क्रिकेट प्रतियोगिता हुँदै, पारस खड्का विरुद्ध ज्ञानेन्द्र मल्ल र मदनकृष्ण भर्सेज हरिवंश भिड्दै