पोखरा, २२ माघ । रेष्टुरेण्ट एण्ड बार एशोसियसन नेपाल (रेवान) ले ग्राहकबाट लिदै आएको १० प्रतिशत सेवा शुल्क खारेज गरेको विरोधमा पोखराका मजदूर आन्दोलित भएका छन् ।

उनीहरुले मंगलबार दिउँसो विभिन्न नाराबाजी गर्दै पोखराको प्रमुख पर्यटकीय क्षेत्र लेकसाइडमा जुलुस निकालेका हुन् । प्लेकार्ड बोकेका सयौं मजदुरले रेवानको निर्णय खारेज गर, १० प्रतिशत सेवा शुल्क कायम छ, मजदूर मारा रेवान मुर्दावाद, राज्यले निर्धारण गरेका सम्पूर्ण सेवा सुविधा लागू गर भन्दै नारावाजी गरेका थिए ।

अखिल नेपाल होटल क्यासिनो तथा रेष्टुरा मजदूर संघ, नेपाल स्वतन्त्र होटल क्यासिनो तथा रेष्टुरेष्ट मजदूर युनियन र नेपाल पर्यटन तथा होटल सम्बद्ध श्रमिक संघसँग आवद्ध मजदूर जुलुसका सहभागी थिए ।

अन्तर्राष्ट्रिय श्रम संगठन (आइएलओ), श्रम नियमावली अनुसार होटल तथा रेष्टुराँमा १० प्रतिशत सेवा शुल्क लगाउने सहमतिअनुरुप आइएलओ तथा राज्यको कानुन अनुसार स्थापित भएको विषयमा रेवानले एकतर्फी रुपमा हटाएर ठूलो गल्ती गरेको भन्दै सच्चाउन मजदुरहरुले माग गरेका छन् ।