पोखरा, २३ पुस। नेपाल विद्यार्थी संघका विद्यार्थीले पोखरामा सोमबार भ्रष्टाचार विरोधी अभियान संचालन गरेका छन्।

पृथ्वीनारायण क्याम्पसबाट शुरु अभियान सोमबार वीपी चोक, शहीदचोक, एयरपोर्ट, तालचोक र पोखरा विश्वविद्यालयमा संचालन गरियो।

ती स्थानमा सरकारको विरोध गर्दै भ्रष्टाचारीलाई प्रवेश निषेध लेखिएको कालो व्यानर टाँसिएको छ। नेपाली काँग्रेस महासमिति सदस्य गुरु बरालले पृथ्वीनारायण क्याम्पसका विद्यार्थीलाई ब्यानर हस्तान्तरण गरी अभियान शुरुवात गरेका हुन्।

कार्यक्रममा महासमिति सदस्य गुरु बरालले भ्रष्टाचारका कारण मुलुक बर्बाद भएको भन्दै भ्रष्टाचार नियन्त्रण गर्न आवश्यक बताए।

‘यो अभियान पोखराबाट शुरु भएको छ,’ उनले भने, ‘यसलाई देशव्यापी बनाउन आवश्यक छ।’

नेवि संघका विद्यार्थीले सरकारले न्याय दिन नसकेको, आपराधिक गतिविधिमा संलग्नलाई संरक्षण गरेको र भ्रष्टाचारीलाई उन्मुक्ति दिन खोजेको आरोप लगाएका छन्।