पोखरा, २१ पुस । मेरो नेपाल युवा क्लबका नयाँ कार्यसमितिका पदाधिकारी तथा सदस्यले शनिबार पदभार ग्रहण गरेका छन् ।

निर्वाचन अधिकृत बोधराज बरालले उनीहरुलाई शपथसहित पदभार ग्रहण गराएका हुन् ।

कार्यक्रममा क्लबका नवनिर्वाचित अध्यक्ष दिवश कुँवरले भावी कार्ययोजना प्रस्तुत गर्दै सेती सिंचाइ नहर सरसफाइ अभियानसहित अन्य सामाजिक कार्यमा प्राथमिकता दिएर काम गर्ने प्रतिबद्धता जनाए ।

नेपाल भारतमैत्री संघका केन्द्रीय सल्लाहकार गुरु बरालले क्लबलाई खेलकुद सामग्री हस्तान्तरण गर्दै आगामी दिनमा पनि सहयोग गर्दै जाने बताए । बरालले क्लबलाई ८ थान फुटबल, ६ थान भलिबल, ४ थान कर्नर फ्ल्याग, चेञ्जिङ बोर्ड, ११ थान फुटबल जर्सी, कीपर तथा भलिबल नेट प्रदान गरेका हुन् ।

उपभोक्ता मञ्च कास्की सचिव मिलन तिवारी, क्लबका पूर्व अध्यक्ष राजकुमार थापा, निवर्तमान अध्यक्ष हरि जिसी लगायतले कार्यसमितिको सफलताको कामना गरेेका थिए ।

पदस्थापनपछि क्लब अध्यक्ष कुँवरको अध्यक्षतामा भएको कार्यक्रममा सहसचिव कर्णबहादुर गुरुङले स्वागत मन्तव्य र संचालन सचिव कमलराज ढुंगानाले गरेका थिए ।

पोखरा १४ स्थित क्लबको गत शनिबार सम्पन्न अधिवेशनबाट दिवश कुँवरको अध्यक्षतामा १३ सदस्यीय नयाँ कार्यसमिति सर्वसम्मत चयन भएको थियो ।