लमजुङ, १९ पुस । नगरपालिकाले सुरक्षा दिलाउने र दोषीलाई कारबाही दायरामा ल्याएर कडा कारबाही गराउने प्रतिवद्धतासँगै सुन्दरबजार नगरपालिका आन्दोलनरत कर्मचारी काममा फर्किएका छन् ।

सुरक्षाको प्रत्याभूति र कर्मचारी कुट्नेलाई कडा कारबाही हुनुपर्ने माग राख्दै दुई दिनदेखि नगरपालिकाको वडा कार्यालयको समेत काम ठप्प पारेका उनीहरु बिहीबार कालोपट्टी बाँधेर काममा फर्किएका हुन् ।

उक्त कार्यालयका लेखापाल श्यामबहादुर पराजुलीलाई जनशक्ति युवा क्लबको अध्यक्ष समेत रहेका नवीन श्रेष्ठले मरणासन्न हुने गरी कुटी रक्ताम्य पारेका थिए । सो घटनापछि सुरक्षाको प्रत्याभूतिको माग र दोषीलाई कारबाही गर्नुपर्ने भन्दै आन्दोलन गर्नुपरेको कार्मचारीले बताएका छन् । विहीबार कार्यालय खुल्नासाथ नगरपलिकाका प्रमुख जनकराज मिश्रले प्रेस विज्ञप्ति जारी गर्दै कर्मचारीको सुरक्षा दिन नगरपालिका प्रतिबद्ध छ भन्ने व्यहोराको प्रतिवद्धता सार्वननिक गरेका थिए ।

विज्ञप्तिमा लेखापाल श्यामबहादुर पराजुलीमाथि नवीन श्रेष्ठले बिनाकारण प्रवेश गरी निर्घात कुटपिट गरी रक्ताम्य बनाएको घटनाप्रति नगरपालिकाको गम्भीर ध्यानाकर्षण भएको र सो घटनाको नगरपालिका परिवार घोर भत्र्सना गर्दछ भन्दै आगामी दिनमा शान्तिसुरक्षा कायम गरी भयरहित वातावरणमा काम गर्ने अवस्था प्रत्याभूति दिलाउन नगरपालिका प्रतिवद्धता व्यक्त गर्दछ भनिएको छ ।

प्रतिबद्धतापछि आफूहरुले कालो पट्टी बाँधेर काममा फकेर्को सो नगरपालिकाका सूचना अधिकारी समेत रहेको दीपेन्द्र पण्डितले बताए ।

कर्मचारीलाई कुट्ने श्रेष्ठ तत्कालीन एमालेनिकट युवा संघको सुन्दरबजार नगर कमिटिको वरिष्ठ उपाध्यक्ष समेत हुन् । उनको खोजी जारी रहेको प्रहरीले जनाएको छ ।