पोखरा, २ पुस। नेपाल निजामती कर्मचारी युनियन (संघ), कास्कीले कर्मचारी समायोजन अध्यादेशका विभिन्न १२ बुँदाप्रति असन्तुष्टि जनाउँदै देशभरबाट सरकारलाई ज्ञापनपत्र पठाएको छ ।

युनियनले ७७ जिल्लाका जिल्ला प्रशासन कार्यालय र प्रदेशका प्रमुख सचिव मार्फत ज्ञापनपत्र पठाएको हो ।

कास्कीमा युनियन आवद्व ६० जनाभन्दा बढी कर्मचारीको समूहले ज्ञापनपत्र बुझाएको सचिव सुरेशकुमार श्रेष्ठले जानकारी दिए ।

नेपाल निजामती कर्मचारी युनियन (संघ), गण्डकी प्रदेशका संयोजक शिव शर्मा अधिकारीले गण्डकी प्रदेशका प्रमुख सचिव लक्ष्मीराम पौडेल र कास्कीका अध्यक्ष डार्विन लम्सालले कास्कीका निमित्त प्रमुख जिल्ला अधिकारी शिशिर पौडेललाई ज्ञापनपत्र बुझाएका थिए ।

ज्ञापनपत्रमा तीनै तहको ऐन जारी नगरी कर्मचारी समायोजन गर्ने व्यवस्था, पुल दरबन्दीमा कायम रहेका कर्मचारीलाई मापदण्ड नबनाई बिनाआधार प्रदेश र स्थानीय तहमा खटाउने व्यवस्था, प्रदेशको प्रमुख सचिव  र प्रदेश मन्त्रायलको सचिव पदमा सम्भव भएसम्म ज्येष्ठता र कार्यक्षमताको आधार खटाउने भन्ने स्वविवेकीय व्यवस्था लगायत बुँदामा असन्तुष्टि जनाइएको छ ।