पोखरा, २९ मंसिर । पोखरा वडा १२ को वडा कार्यालय भवन शिलान्यास गरिएको छ । महानगरका मेयर मानबहादुर जिसीले शुक्रबार भवन शिलान्यास गरेका हुन्।

कार्यक्रममा उनले जनताको तिरेको करवाट निर्माण हुने संरचना जनताकै भएको र यसको संरक्षण पनि स्थानीयके जिम्मामा रहने बताए। जनताले खाइ नखाइ तिरेको करले नै यहाँका संरचना निर्माण हुने गरेकोले सेवा पनि जनमुखी हुनु पर्ने प्रमुख जिसीको भनाइ थियो।

पोखरा महानगरपालिकाभित्र सबै वडा कार्यालय यही वर्षभित्र बनाइ सक्ने योजना अनुसार काम अगाडि बढेको केही वडाको निर्माण कार्य सम्पन्न भइसकेको र बाँकीको निर्माण कार्य भइरहेको उनले बताए।

वडा १२ का वडाध्यक्ष रामबहादुर कार्कीले जनतालाई सहज सेवा प्रदान गर्ने उद्देश्यले सुविधा सम्पन्न वडा कार्यालय बनाउन लागेको बताए।

सो अवसरमा मेयर जिसीले वडा १२ का ५ देखि १२ वर्षसम्मका सम्पूर्ण बालबालिका विद्यालय बाहिर नरहेको घोषणा गरेका छन्।

विद्यालय बाहिर रहेका २ ओटा बालबालिकालाई स्थानीय सरस्वती आधारभूत विद्यालयमा भर्ना गराएपछि सो घोषणा गरिएको हो।

यस्तै वडा कार्यालयले शुक्रबारदेखि नै राजश्व संकलन शुरु गरेको छ। शुक्रबार पहिलो करदाता वडा सदस्य सीतादेवी बास्तोलाले तिरेको करको रसिद मेयर जिसीले हस्तान्तरण गर्दै सेवा शुभारम्भ गरिएको हो।