पोखरा, २४ मंसिर। सोह्रदिने महिला हिंसाविरुद्धको अभियानअन्तर्गत पोखरामा सोमबार प्रदर्शन गरिएको छ।

नेपाल महिला संघ क्षेत्र २ कास्की र नेपाल महिला संघ कास्कीले संयुक्त रुपमा प्रदर्शन गरेको हो।

पोखरा चिप्लेढुंगास्थित नेपाली काँग्रेसको कार्यालयबाट शुरु भएको प्रदर्शन महेन्द्रपुल हुँदै वीपीचोक पुगेको नेपाल महिला संघ कास्कीकी सभापति कोपिला रानाभाटले जानकारी दिइन् ।

प्रदर्शनपछि वीपीचोकमा आधा घण्टा धर्ना दिदै दिउँसै मैनबत्ती बालेर न्याय खोजिएको थियो।

कञ्चनपुरकी निर्मला पन्त, कास्कीकी पुष्पा कार्की, श्रेया बिक लगायत महिलामाथि हुने हत्याहिंसा र बलात्कारविरुद्व प्रदर्शन गर्दै सरकारसँग न्याय खोजिएको नेपाल महिला संघ क्षेत्र २ कास्कीकी सभापति शारदा गिरीले जानकारी दिइन्।

प्रदर्शनमा निर्मला पन्तका हत्यालाई कठघरामा ले, महिला हिंसा अन्त्य गरौं, टोल/टोलमा सरकार, गोजी/गोजीमा भ्रष्टाचार, सरकार भेटियो न्याय भेटिएन, सरकार सक्छस् न्याय दे, नसके राजीनामा दे लगायत अंकित प्लेकार्ड प्रदर्शन गरिएको थियो।

कार्यक्रम नेपाल महिला संघ क्षेत्र २ कास्कीकी सभापति शारदा गिरीको अध्यक्षतामा भएको थियो।