स्वतन्त्रले सम्झियो गोर्खा स्मारक

स्मारकलाई राष्ट्रिय अस्मिताको रूपमा लिन आग्रह

आदर्श समाज सम्वाददाता
मंसिर ६, २०७५

हेमजा, ५ मंसिर। स्याङ्जा फेदीखोला-१, साल्मेडाँडामा निर्माणाधीन गोर्खा स्मारकलाई राष्ट्रिय अस्मिताको रुपमा लिन आग्रह गरिएको छ।

स्वतन्त्र पत्रकार संघ नेपाल, कास्की शाखाको आयोजनामा बुधवार पोखरामा भएको ‘गोर्खा स्मारक उद्देश्य र उपलब्धि’ विषयक अन्तरक्रियाका वक्ताले स्मारकलाई राष्ट्रिय अस्मिता भएको ठहर गर्दै त्यस्तो आग्रह गरेका हुन्।

फेदीखोला गाउँपालिका उपाध्यक्ष देवी थापाले स्मारक गाउँपालिकाको गहनाका रुपमा रहेको औँल्याउँदै त्यसको पूर्वाधार विकासमा गाउँपालिकाले सक्दो सहयोग गर्ने बताइन्।

स्मारकसम्म पुग्ने बाटो स्तरोन्नतिका लागि आफूहरुले सहयोग गरिरहेको स्मरण गर्दै उपाध्यक्ष थापाले अब शौचालय निर्माणमा पनि सहयोग गर्ने जनाइन्। स्मारकका लागि करिब ३ सय रोपनी जग्गा जुटाउने कार्य आफैमा महत्वपूर्ण रहेको उनको ठम्याइ थियो।गोर्खा स्मारकबारे कार्यपत्र प्रस्तुत गर्दै स्मारक कोषका महासचिव डा चन्द्रबहादुर गुरुङले नेपालको परराष्ट्र नीतिमा गोर्खा सैनिकको योगदान पनि आउनुपर्ने भन्दै हजारौ नेपालीले विश्वशान्तिका लागि देहत्याग गरेको सम्झिए। उनले विश्वका विभिन्न ठाउँमा गोर्खालीको चिहान रहेको तर त्यहाँ गोर्खालीको नाम नरहेको स्मरण गर्दै भारतले गोर्खालीप्रति नकारात्मक सन्देश फैलाइरहेको बताए।

महासचिव डा गुरुङले स्मारक निर्माणपछि नेपाल र बेलायती प्रधानमन्त्रीबाट संयुक्त रुपमा उद्घाटन गराउने आफूहरुको लक्ष्य रहेको जनाए। सरकारी निकाय मार्फत स्मारकका लागि हालसम्म  पाँच करोड ५० लाख रुपैयाँ निकासा भइसकेको भन्दै गुरुङले गेसो आन्दोलनको योगदानबारे चर्चा गरेका थिए। पर्यटन र राष्ट्रियताका हिसाबले स्मारक महत्वपूर्ण रहेको उनको ठहर थियो।

यसैगरी, उनले अन्तरक्रियामा सहभागीद्वारा राखिएका जिज्ञासाको जवाफ दिएका थिए।

फेदीखोला-१ का अध्यक्ष खेमबहादुर खत्रीले सरोकारवाला सबैको ध्यान स्मारकको कार्य सम्पन्नता गर्नेतर्फ हुनपर्ने जनाए।

निर्माण समिति अध्यक्ष पूरनध्वज गुरुङले २ वर्षमा समाधिस्थल निर्माण सम्पन्न गर्ने योजना रहेको सुनाउँदै स्मारकलाई राष्ट्रिय गौरवको आयोजनाको संज्ञा दिए। उनले ६० हजार पितृको नाममा सैनिक पोशाकमा मूर्ति स्थापना गरिएको पनि जनाए।

स्वतन्त्र पत्रकार संघ नेपालका राष्ट्रिय अध्यक्ष कृष्णप्रसाद बास्तोलाले स्मारकको महत्वमाथि चर्चा गरेका थिए।

स्मारकमा हाल समाधिस्थल तथा खानेपानी आपूर्र्तिको कार्य भइरहेको छ। त्यस अलावा गोर्खा म्यूजियम, १९ वटा विभिन्न जातिका घर, ६३ मिटर अग्लो टावर तथा तीन डिब्बे रेल चलाउने योजना पनि छ। कास्की र स्याङ्जाको सिमाना साल्मेडाँडा पोखराबाट १७ किलोमिटर दक्षिणमा पर्दछ। स्वतन्त्र पत्रकार संघ कास्की अध्यक्ष कृष्ण थापाको अध्यक्षतामा सम्पन्न कार्यक्रममा उपाध्यक्ष कृष्ण रानाभाटले स्वागत र सचिव असफल गौतमले सञ्चालन गरेका थिए।

Related News

सम्बन्धित समाचार

  • शिक्षासेवी कोइरालाको नाममा प्रतिष्ठान

    आदर्श समाज सम्वाददाता मंसिर २१, २०७९
    पोखरा । शिक्षासेवी हेरम्बप्रसाद कोइरालाको योगदान चिरस्थायी बनाउन हेरम्बप्रसाद÷पार्वती कोइराला शिक्षा प्रतिष्ठान–२०७९ घोषणा गरिएको छ । कोइराला दम्पतीको चौरासी पूजा…
  • निशुल्क स्वास्थ्य शिविर

    आदर्श समाज सम्वाददाता मंसिर २१, २०७९
    पोखरा । रोट्याक्ट क्लब अफ न्युरोड पोखरा, रोट्याक्ट क्लब अफ मणिपाल मेडिकल साइन्स र रोटरी क्लब अफ न्युरोड पोखराको संयुक्त…
  • महानगरकै नमुना सडक !

    आदर्श समाज सम्वाददाता मंसिर २१, २०७९
    लेखनाथ । पोखरा २६ स्थित प्रगतिटोलको सडक ढलान तथा नाला निर्माण योजनाको सोमबार वडाध्यक्ष नरेन्द्र थापाले शुभारम्भ गरेका छन् ।…
  • अन्तरविद्यालय चित्रकला

    आदर्श समाज सम्वाददाता मंसिर २१, २०७९
    पोखरा । सातौं पर्वतीय महोत्सवअन्तर्गत अन्तर्राष्ट्रिय पर्वतीय संग्रहालयमा अन्तरविद्यालयस्तरीय चित्रकला भएको छ । पर्वतीय महोत्सवको पूर्वसन्ध्यामा नेपाल पर्वतारोहण संघ र…
  • लैंगिक हिंसाविरुद्ध सचेतना र्‍याली

    आदर्श समाज सम्वाददाता मंसिर २१, २०७९
    पोखरा । सामुदायिक वन उपभोक्ता महासंघ नेपालले लैंगिक हिंसा न्यूनीकरणका लागि राष्ट्रव्यापी रुपमा १६ दिने अभियान सञ्चालन गरेको छ ।…

hero news full width