पोखरा, ५ मंसिर । नेपाल अर्बुद रोग निवारण संस्था र पोखरा ५ को संयुक्त आयोजनामा क्यान्सर तथा प्रसूती रोगसम्बन्धी सचेतना एवं भिआइए परीक्षण सम्पन्न भएको छ ।

भक्तपुर क्यान्सर अस्पतालका वरिष्ठ अंकोलोजिष्ट डा उज्ज्वल चालिसे र गण्डकी अस्पतालका वरिष्ठ स्त्री रोग विशेषज्ञ डा गिरधारी शर्माले प्रसूति रोग, पाठेघर र स्तन क्यान्सर लगायत क्यान्सर रोगको कारण, यसबाट बच्ने उपायबारे प्रशिक्षण दिएका थिए ।

सो अवसरमा महिलालाई स्वास्थ्य सचेतना दिनुका साथै २ सय १५ जना जनाको भिआइए परीक्षण गरिएको नेपाल अर्बुद रोग निवारण संस्था कास्कीका सदस्य तथा जनसर्म्पर्क अधिकृत डिल्लीप्रसाद शर्माले जनाए।

प्रमुख अतिथि पोखरा ५ का वडाध्यक्ष धनबहादुर नेपालीले विभिन्न संघसंस्थासँग सहकार्य गर्दै वडावासीलाई स्वास्थ्य सेवा प्रदान गर्दै जाने जनाए ।

नेपाल अर्बुद रोग निवारण संस्था कास्कीका सभापति रामचन्द्र थापाको अध्यक्षतामा भएको कार्यक्रममा अर्बुद रोग निवारण संस्थाका केन्द्रिय सदस्य दिनेशशंकर पालिखे, पोखरा महानगरपालिका स्वास्थ्य महाशाखा प्रमुख हेमन्त शर्मा, पोखरा ५ का वडासदस्य हरिमाया बिक, अञ्जु केसी, सूर्यचन्द्र विकास समाजकी गायत्री भूतेल, सहभागीतर्फबाट कल्पना क्षेत्री, उषा थापा, सरस्वती अधिकारी लगायतले क्यान्सर रोग, यसको रोकथाम र उपचारबारे बताए।

नेपाल अर्बुद रोग निवारण संस्थाका सहकोषाध्यक्ष तथा कार्यक्रम संयोजक सुवर्णकोइरालाले कार्यक्रम उद्देश्यबारे प्रकाश पारेका थिए ।

कार्यक्रममा स्वागत मन्तब्य संस्थाका सचिव नारायण पराजुलीले र संचालन पोखरा ५ का वडासदस्य उज्ज्वल खत्रीले गरेका थिए ।