पोखरा, ४ मङ्सिर । कास्कीको निर्वाचन क्षेत्र नं १ को योजनाहरुको एक कार्यक्रमबीच मंगलबार पोखरामा सार्वजनिक गरिएको छ ।

जिल्लाको उक्त निर्वाचन क्षेत्रमा पर्ने रुपा गाउँपालिका र मादी गाउँपालिका तथा पोखरा महानगरपालिकाको केही वडाभित्र सिफारिस एवं छनौट गरिएका आयोजनाहरुको मंगलबार पत्रकार सम्मेलनबीच सार्वजनिक गरिएको हो । कास्की क्षेत्र नं. १ का प्रतिनिधिसभा सांसद खगराज अधिकारीले योजना सार्वजनिक गरेका हुन् ।

नेपाल राजपत्रमा गत असोज १७ गते प्रकाशित संघीय मामिला तथा सामान्य प्रशासन मन्त्रालयको सूचनाअनुसार स्थानीय पूर्वाधार विकास साझेदारी कार्यक्रम सञ्चालन कार्यविधि नियमावली ०७५ बमोजिम कास्कीको १ नं क्षेत्र विकास आयोजनाबारे परामर्श समितिको बैठक बसेको थियो ।

बैठकबाट सिफारिससमेतलाई केन्द्रीत गरेर रुपा गाउँपालिका, मादी गाउँपालिका र पोखरा महानगरपालिका प्रमुख र परामर्श समितिका सदस्यहरुको सल्लाहका आधारमा कार्तिकको २५ गते बसेको निर्देशन समितिको बैठकले आयोजनाहरुको छनौट र सिफारिस गरेको सांसद अधिकारीले जनाए ।

जसअनुसार सबैभन्दा ठूला आयोजनामध्ये मादी-१ को सम्पदा मार्ग (ताङतिङ-क्होंलासोथर) सडक छनौटमा परेको छ । उक्त आयोजनाका लागि ७० लाख विनियोजन गरिएको छ ।

त्यसपछि, र पोखरा-३० को लेखनाथ साना शहरी खानेपानी तथा सरसफाई उपभोक्ता संस्था छनौटमा परेको छ । उक्त आयोजनाका लागि ५० लाख विनियोजन गरिएको छ । पोखरा २९ र ३० वडाभित्र पर्ने शिशुवा- आदर्शचोक सडक र पोखरा-३२ को राधाकृष्ण बृद्धाश्रम भवन निर्माणका लागि समान १५ लाख विनियोजन गरिएको छ । अन्य योजनाहरुमा पोखरा-१२ को ढिकालेथर शिवमार्ग सडक, पोखरा-१३ को रतन पाण्डे मावि, पोखरा-१४ कदममार्ग सडक, पोखरा-२७ कृषि उपज संकलन केन्द्र तालचोक र पोखरा-२८, स्याङ्खुदी-अधिना- भुर्तेल गाउँ सडकमार्गका लागि समान दश लाख विनियोजन रकम छुट्याइएको छ ।

त्यसैगरी, पोखरा-१० को सोलार बत्ती जडान, पोखरा-२८ को विजयपुर-सुनपँदाली-सुर्के मैदान सडक, मादी-९ को हिमालय मावि, गोर्जे, मादी-४ को ध्रुब मावि, तारकाङ, मादी-३ को सिताराम मावि, याङ्जाकोट मादी-१ को अन्नपूर्ण मावि, सिक्लेस र रुपा गाउँपालिकाको रामकोट-रामादी सडक, विश्वशान्ति मावि, देउराली र गाउँर्फक मावि, सिद्धका लागि समान १० लाख विनियोजन गरिएको छ ।

विद्यालयहरुका लागि विनियोजन गरिएका रकम भवन निर्माण तथा पूर्वाधारका लागि मात्र खर्च गरिने सांसद अधिकारीले जनाए ।

कार्यक्रममा उक्त निर्वाचन क्षेत्रबाट निर्वाचित गण्डकी प्रदेश सांसदहरु दिपक कोइराला, मनबहादुर गुरुङ, रुपा गाउँपालिका अध्यक्ष नवराज ओझा र मादी गाउँपालिका अध्यक्ष बेलबहादुर गुरुङलगायत परामर्श समितिका सदस्यहरुको उपस्थिति थिए ।