एमाले-माओवादी एकता जटिल बन्दै   

Avatar आदर्श समाज सम्वाददाता
वैशाख १६, २०७५

काठमाडौं, १५ वैशाख। एकताको लागि विवादित विषयमा सहमति गर्ने जिम्मा भएको शीर्ष नेतृत्वले पनि सहमति जुटाउन नसकेपछि एमाले र माओवादी केन्द्रबीचको एकता प्रक्रिया जटिल बन्दै गएको छ। उच्चस्तरीय कार्यदल तहमा सहमति हुन नसकेपछि सहमतिको जिम्मा दुवै दलका अध्यक्षलाई दिइएको थियो।

एकताका लागि जनयुद्धलाई हेर्ने दृष्टिकोण, केन्द्रीय समितिमा समायोजनको प्रतिशत, चुनाव चिन्ह लगायतमा विवाद कायम छ।

एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहालबीच शुक्रबार र शनिबार लगातार छलफल भए पनि कुनै निष्कर्ष निस्कन सकेन।

दुवै नेताबीच शनिबार बिहान पनि करिब २ घण्टा लामो वार्ता भएको थियो। श्रोतका अनुसार शनिबार त एकताको विषयमा कुनै कुराकानी समेत नगरी वार्ता टुंगिएको छ।

गृहमन्त्री रामबहादुर थापा समेतको उपस्थितिमा प्रधानमन्त्री निवास बालुवाटारमा भएको वार्ता सुरक्षा व्यवस्थापनका विषयमा मात्र केन्द्रित भएको जनाइएको छ।

शुक्रबार साँझ पनि एकतालाई टुंगाउन छलफल गरेका ओली र दाहालबीचको वार्ता बिनानिष्कर्ष टुंगिएपछि शनिबार बिहान वार्ता गर्ने सहमति भएको थियो।

वार्तामा प्रदेशहरुमा सुरक्षा निकायहरुको व्यवस्थापन कसरी गर्ने भन्ने सम्बन्धमा ओली, दाहाल र थापाबीच कुराकानी भएको स्रोतले बतायो। शुक्रबारको वार्ता एकतामा सबैभन्दा जटिल विषय बनेको केन्द्रीय कमिटीको घोषणासहित पार्टीएकतामा केन्द्रित थियो। दाहालको केन्द्रीय कमिटीमा बराबरी स्थानको दावी र ओलीको बराबरी स्थान दिन नसक्ने जवाफका कारण मिल्न सकेको छैन। शीर्ष तहमा सहमति जुट्न नसक्दा एकता घोषणा कहिले हुने भन्नेमा अन्योलता बढ्दै गएको छ।

यसैबीच, नेकपा माओवादी केन्द्रका नेता नारायणकाजी श्रेष्ठले प्रतिशतको आधारमा एमाले र माओवादीबीच पार्टीएकता नहुने बताएका छन्। पार्टीको आन्तरिक कार्यक्रममा भाग लिन गोरखा पुगेका नेता श्रेष्ठले पत्रकार सम्मेलनमा बोल्दै सम्माजनक तवरले समानताको नीति अनुरुप एकता हुने बताए। प्रतिशतको आधारमा पार्टीएकता नहुने र प्रतिशतको विषय बाहिर चर्चाको विषयमात्रै भएको उनको भनाई थियो।

एकीकृत भएपछि ६० प्रतिशत जनताको प्रतिनिधित्व गर्ने पार्टीहुने भएकाले नेता कार्यकर्ताको व्यवस्थापनमा केही समस्या देखिए पनि जटिल भने नरहेको उनको भनाइ छ।

वैचारिक लाइन फरक रहेको दुर्इ ठूला पार्टीको एकीकरण सहज नभए पनि इतिहासको आवश्यकता र जनताको चाहना मुताविक पार्टीएकता गर्न लागेको उनले दाबी गरे।

दुर्इ अध्यक्षबीच छलफल पछि बस्ने पार्टीएकता संयोजन समितिको बैठकले पार्टीएकता घोषणाको मिति तय गर्ने श्रेष्ठले जानकारी दिए।

प्रतिक्रिया

Comments on एमाले-माओवादी एकता जटिल बन्दै   

अन्य समाचार

वाइवाइको पुरस्कार वितरण

पोखरा, १६ वैशाख। पोखरामा चौधरी ग्रुपको उत्पादन वाइवाइ चाउचाउको पुरस्कार वितरण गरिएको छ । गण्डकी क्षेत्रका करिब ३ सय जना व्यवसायीको उपस्थितिमा भएको लक्की ड्रमा नेत्र किराना नदीपुरलाई प्रथम पुरस्कार ४३ इन्चको सिजी टिभी उपहार परेको छ। व्यवसायीलाई सय कार्टुन वाइवाइ चाउचाउ खरिदमा एउटा पहेँलो कुपन र पाँच सय कार्टुन चाउचाउ खरिदमा एउटा हरियो कुपन बोनस प्रदान गरिएको थियो। उक्त कुपनमध्ये लक्की ड्र गरी पुरस्कार वितरण गरिएको चौधरी ग्रुपका सिनियर म्यानेजर मिलन राणाले जानकारी दिए। मुस्कान स्टोर्स र मीनबहादुर शेरचन स्टोर्सले द्वितीय पुरस्कारअन्तर्गत ३२ इन्चको सिजी टिभी उपहार हात पारेका छन्। तृतीय पुरस्कार सामसुङ ग्यालेक्सी मोबाइल शिवशक्ति किराना स्टोर्स, तिवारी स्टोर्स…

शुक्लागण्डकी महायज्ञमा दानको ओइरो

पाँचौ दिनसम्म ७१ लाख बढी संकलन

हेमजा, १५ वैशाख। घाचोकस्थित शुक्लागण्डकी माविमा जारी विराट शैक्षिक श्रीमद्भागवत धनधान्याचल महायज्ञको पाँचौ दिन शनिवार दानको ओइरो लागेको छ। अन्य दिनको तुलनामा महायज्ञमा भक्तजनको समेत बाक्लो उपस्थिति थियो । शनिवार मात्रै २९ लाख ५५ हजार ५ सय ५ रुपैयाँ दान संकलन भएको छ। जसअनुसार सबैभन्दा बढी घाचोक निवासी लक्ष्मीप्रसाद तथा थानकुमारी पोखरेलको परिवारबाट तुलादान समेत गरी २ लाख २७ हजार ३ सय ११ दान भयो । यसरी महायज्ञमा हालसम्म ७१ लाख १२ हजार २ सय ८४ दान रकम संकलन भएको महायज्ञका महासचिव…