हेमजा, १५ बैशाख। ए एण्ड बी इन्टरनेशनल हस्पिटल पोखरा -साविक एबी केयर) तथा सामुदायिक सेवा तथा सामुदायिक प्रहरी सेवा केन्द्र पोखरा-२५, हेमजाको संयुक्त आयोजनामा हेमजामा निःशुल्क स्वास्थ्य परीक्षण शिविर सम्पन्न भएको छ।

शिविरमा हाडजोर्नी तथा नशा, मधुमेह, थाइराइड, उच्च रक्तचाप, प्यारालाइसिस, पेट, छाती तथा मुटुरोग एवं प्रसूति र स्त्री रोगको परीक्षण गरिएको थियो।

उक्त शिविरबाट ५ सय २४ जनाले सेवा लिएका छन्। जसअनुसार २ सय ५० जनाको हाडजोर्नी तथा नशा, १ सय ७५ जनाको फिजिसियन र ९९ जनाको प्रसूति तथा स्त्री रोगको परीक्षण गरिएको ए एण्ड बी इन्टरनेशनल हस्पिटल प्रबन्ध निर्देशक ऋषि खतिवडाले जानकारी दिए।

सो स्वास्थ्य परीक्षण शिविर हाडजोर्नी तथा नशा रोग विशेषज्ञ डा रविमोहन ढकालको नेतृत्वमा भएको हो। जसमा ५ जना चिकित्सकसहित २३ जना स्वास्थ्यकर्मी सहभागी थिए। हेमजाकी जेष्ठ नागरिक देवु बास्तोलाको छाती जाँच गरी शिविरको शुभारम्भ गरिएको हो।

कार्यक्रम सामुदायिक सेवा तथा सामुदायिक प्रहरी सेवा केन्द्र हेमजाकी अध्यक्ष विष्णु बास्तोलाको अध्यक्षतामा सम्पन्न भएको हो।