पोखरा, ७ माघ । रोटरी क्लब अफ पोखरा लेकसाइडले सप्तरीका शीतलहर पीडितलाई न्यानो कपडा सिरक तथा ब्ल्याङ्केट वितरण गरेको छ ।

कार्यक्रम संयोजक अर्जुनप्रसाद खनालको नेतृत्वमा सप्तरीको हनुमाननगर कंकालिनी नगरपालिका-१४ का बाढी प्रभावित क्षेत्रका वृद्धवृद्धा, अपांग, बालबालिका तथा असहायलाई उक्त न्यानो कपडा वितरण गरिएको हो ।

खनालका अनुसार २५ थान सिरक, ७५ थान ब्ल्याङ्केट र २० थान झुल वितरण गरिएको हो ।

सो अवसरमा हनुमाननगर कंकालिनी वडा १४ का अध्यक्ष सत्यनारायण यादव, सशस्त्र प्रहरी उपरीक्षक रामाअधार यादव, पत्रकार चन्दनकुमार यादव लगायत सहभागी थिए ।

हिमाल, पहाड र तराईमा परेको विपद्मा सहयोगको मल्हम लगाउनु सबैको कर्त्तव्य भएको र रोटरी पोखरा लेकसाइडले पनि विभिन्न समयमा सामाजिक कार्य गर्दैआएको कार्यक्रम संयोजक खनालले बताए ।