सञ्जीव पालको निधनले तारादेवी–अरुणा लामा स्मृति स्रष्टा साँझ स्थगित

आदर्श समाज सम्वाददाता
माघ १८, २०८१
Aruna Lama Tara devi smriti sajh 3

पोखरा । पोखरामा शनिबारका लागि अन्तिम तयारी गरिएको तारादेवी–अरुणा लामा स्मृति स्रष्टा साँझ स्थगित भएको छ ।

स्वरसाम्राज्ञी तारादेवी र अरुणा लामाको स्मृति दिवस सन्दर्भमा पोखरेली महिला कलाकारहरुको साझा संस्था हार्मोनी र एभरेस्ट एफएम संयुक्त आयोजनामा हुन लागेको सो कार्यक्रमका गिटारिष्ट सञ्जीव पालको निधनको शोकमा स्थगित गरिएको हो । पालको शुक्रबार दिउँसो हृदयघातका कारण निधन भएको हो । घरमा आराम गरिरहेका बेला उनलाई एक्कासि ह्रदयघात भएपछि तत्काल गण्डकी मेडिकल कलेज लगिएको थियो । उनको उपचार क्रममा निधन भएको परिवारजनले जनाएको छ ।

स्व.सञ्जीव पाल ।

पालको निधनमा शोक व्यक्त गर्दै अरुणा लामा–तारादेवी स्मृति स्रष्टा साँझका संयोजक दीपेन्द्र श्रेष्ठले हाल कार्यक्रम स्थगित गरिएको बताए । उनले भने, ‘कार्यक्रमको तयारी पूरा भएको थियो तर उहाँ (गिटारिष्ट पाल) को निधनको शोकमा साँझ स्थगित गरेका छौं । अर्को मिति छिट्टै घोषणा गर्नेछौं ।’

स्वरसाम्राज्ञी तारादेवी र अरुणा लामाको स्मृति दिवस सन्दर्भमा माघ तेस्रो शनिबार हुँदै आएको सो साँझ यसपालि तेस्रो संस्करण हो । तारादेवीको माघ १० र अरुणा लामाको माघ २२ गते स्मृति दिवस पर्छ । कार्यक्रम पोखरा इभेन्ट सेन्टरमा शनिबार साँझका लागि तय गरिएको थियो ।

Related News

सम्बन्धित समाचार

hero news full width