पोखरा । टाइगर ग्रुप अफ पोखरा नेपालको आयोजनामा शनिबारदेखि पोखरामा पाँचौं संस्करणको टाइगर कप भलिबल प्रतियोगिता सुरु भएको छ ।

यही १९ माघसम्म पोखरा रंगशालाको भलिबल कोर्टमा हुने प्रतियोगिताको उद्घाटन सञ्चार तथा सूचना प्रविधि मन्त्री पृथ्वीसुव्वा गुरुङले गरे ।

पहिलो दिन महिलातर्फ ३ खेल भयो । तीमध्ये अन्तिम खेल लाइट प्रोटेस्टका कारण स्थगित भयो । आयोजक र त्रिभुवन आर्मी क्लबबीच भएको तेस्रो तथा अन्तिम खेल लाइट प्रोटेस्टका कारण स्थगित भएको हो । पहिलो सेटमा २२–२० को अग्रता जोगाउन नसक्दा आयोजक टोली २३–२५ ले गुमाउन पुग्यो । दोस्रो सेटमा आर्मीले २५–२२ ले आफ्नो पक्षमा पार्‍यो । तेस्रो सेट भने आयोजकले २५–२१ ले जित हासिल ग¥यो । र, लाइट प्रोटेस्टका कारण स्थगित गरिएको रेफ्री टहलसिंह थापाले बताए ।

त्यसअघि, पहिलो खेलमा एपिएफले थाइल्याण्डको ट्राभल इन्क्वायरी युनाइटेड प्यासन भलिबल क्लबलाई ३–२ सेटले पराजित गरेको थियो । अर्को खेलमा टिपटप न्यू डायमन्ड स्पोर्ट्स क्लबले नेपाल पुलिस क्लबलाई ३–२ ले हराएको थियो ।

प्रतियोगितामा महिला तथा पुरुषतर्फ २ विदेशी टोलीसहित ६÷६ टोलीले भाग लिएका छन् । पुरुषतर्फ भारतको सुनिल भलिबल क्लब कुरुक्षेत्र, हेल्प नेपाल स्पोर्टस् क्लब, गण्डकी प्रदेश भलिबल संघ, नेपाल पुलिस क्लब, त्रिभुवन आर्मी क्लब र एपिएफ छन् । महिलातर्फ थाइल्याण्डको ट्राभल इन्क्वायरी युनाइटेड प्यासन भलिबल क्लब, एपिएफ, टिपटप न्यू डायमन्ड स्पोर्टस् क्लब, त्रिभुवन आर्मी, नेपाल पुलिस र आयोजक छन् ।

महिला तथा पुरुष दुवैतर्फ विजेताले ५ लाख ८५ हजार रुपैयाँ पाउने छन् । उपविजेताले २ लाख ८५ हजार र तृतीयले १ लाख ८५ हजार रुपैयाँ पाउने प्रतियोगिता संयोजक रामकृष्ण ज्ञवालीले बताए । सर्वाेत्कृष्ट खेलाडीले २५ हजार प्राप्त गर्दा विधागततर्फ उत्कृष्टलाई जनही १० हजार रुपैयाँ प्रदान गरिने टाइगर ग्रुप अफ पोखराका अध्यक्ष नारायणप्रसाद शर्माले बताए । आयोजकले महिलातर्फ पहिलोपल्ट टिम मैदान उतारेको प्रचार संयोजक इन्द्रप्रसाद पौडेलले बताए ।

प्रतियोगिता हेर्न प्यारापिटमा दर्शक खचाखच भरिएका थिए । यो प्रतियोगिताले पछिल्लो समय भलिबल क्रेज बढाउन मद्दत पुर्‍याएको छ ।

विगतको तुलनामा यसपालि प्रतियोगिता नयाँ फरम्याटमा खेलाइँदैछ । पुरुष र महिलातर्फ ६–६ टोलीमा दुवैतर्फ पहिला ३ खेल नकआउटमा हुनेछ । त्यसपछि विजयी टिम एकातर्फ र पराजित टिम अर्कातर्फ रहने छन् । दुवै समूहमा लिग खेलाइनेछ । लिगमा प्रत्येक टोलीले दुई खेल खेल्नेछन् । जित्ने समूहबाट पहिला र दोस्रो स्थानमा रहने टोलीले क्वालिफायर खेल्ने छन् । तेस्रो स्थानमा रहने टोलीले एलिमिनेटर खेल्नेछ । हारेका टोलीको समूहबाट शीर्ष स्थानमा रहने टोलीले एलिमिनेटर खेल्नेछ । दोस्रो र तेस्रो स्थानमा रहने टोली प्रतियोगिताबाट बाहिरिने छन् ।

पहिलो क्वालिफायरको विजेताले फाइलनमा यात्रा सुरश्चित गर्नेछ भने पराजित टोलीले एलिमिनेटर विजेता टोलीसँग दोस्रो क्वालिफायर खेल्नेछ । १९ माघमा फाइनल हुनेछ ।