गण्डकी प्रदेशका पत्रकारलाई धितोपत्र बजार र वस्तु विनिमय बजारसम्बन्धी तालिम

आदर्श समाज सम्वाददाता
माघ ९, २०८१
474047997_598476762880921_1819602404695847388_n

पोखरा । नेपाल धितोपत्र बोर्डको आयोजना र नेपाल पत्रकार महासंघ गण्डकी प्रदेशको समन्वयमा गण्डकी प्रदेशका आर्थिक पत्रकारहरूको लागि धितोपत्र बजार र वस्तु विनिमय बजारसम्बन्धी तालिम सम्पन्न भएको छ।

बुधबार पोखरामा उक्त तालिमको उद्घाटन गर्दै गण्डकी प्रदेशका आर्थिक मामिला मन्त्रालयका सचिव राजेन्द्रदेव पाण्डेले पत्रकारहरूको लागि नेपालको पूँजी बजार र वस्तु विनिमय बजारको समग्र प्रणालीबारे जानकारी दिनु महत्वपूर्ण रहेको बताए । उनले यस प्रकारका कार्यक्रमले पत्रकारलाई वित्तीय समाचार लेखनमा थप दक्षता प्रदान गर्ने र आमनागरिकलाई आर्थिक सचेतनाका लागि सहयोग पु¥याउने विश्वास व्यक्त गरे।

नेपाल धितोपत्र बोर्डका उपकार्यकारी निर्देशक नीरञ्जय घिमिरेले साना तथा मझौला सङ्गठित संस्थाको धितोपत्र निष्काशन तथा कारोबार धितोपत्र बजारको नियमन र विकासको बारेमा जानकारी दिँदै पत्रकारलाई बजारको संरचना र नियामक प्रणालीको महत्व बुझ्नका लागि आग्रह गरे ।

कार्यक्रममा नेपाल स्टक एक्सचेन्जका सहायक प्रबन्धक, मुरारी पराजुली र सिडिएस क्यिरिङका उपप्रबन्धक सुरेश न्यौपाने, नेपाल धितोपत्र बोर्डका सहायक निर्देशक गौरव बरालले नेपाल धितोपत्र बजारको संरचना, दोस्रो बजारमा राफसाफ र फछ्यौट व्यवस्था, एसएमई प्लेटफर्म र वस्तु विनिमय बजारको नियमन, साथै नेपालका पूँजी बजारमा भएका पछिल्ला विकासहरू बारेमा सहजीकरण गरेका थिए ।

नेपाल पत्रकार महासंघ, गण्डकी प्रदेशका अध्यक्ष, रमेश पौडेलले आर्थिक बिटमा कलम चलाउन चाहने पत्रकारहरूको थप क्षमता वृद्धिका लागि तालिमको आयोजना गरिएको बताए ।

महासंघका उपाध्यक्ष प्रकाश पौडेलले स्वागत सहित विषयवस्तुमाथि प्रष्टाएका थिए ।

तालिमका सहभागीले आर्थिक पत्रकारितामा नयाँ दृष्टिकोण थप्ने र वित्तीय क्षेत्रका गहन र तथ्यपरक समाचार तयार गर्न मद्दत पु¥याउने धारणा राखेका थिए । तालिममा गण्डकी प्रदेशका विभिन्न जिल्लाबाट ५० जना पत्रकारको सहभागिता रहेको महासचिव जमुना वर्षा शर्माले जानकारी दिइन्।

Related News

सम्बन्धित समाचार

hero news full width