पोखरा । सशस्त्र प्रहरी नायब उपरिक्षक (डिएसपी) एवं संगीतकार सुरेश गैरे दुई उपाधिबाट सम्मानित भएका छन् । २४ औं सशस्त्र प्रहरी दिवस अवसरमा मंगलबार काठमाडौंमा आयोजित विशेष समारोहमा उनलाई ‘एपिएफ कला साहित्य सम्मान’ तथा ‘एपिएफ आईजी कमन्डेसन’ बाट सम्मान गरिएकाे हाे ।

गैरेलाई सशस्त्र प्रहरी महानिरीक्षक राजु अर्यालले उक्त सम्मानसहित सम्मानपत्र हस्तान्तरण गरेका थिए ।

संगठनमा योग्य र उत्कृष्ट कर्मचारीका रुपमा रहँदै आएका पाल्पाका डिएसपी गैरे यसअघि सशस्त्रका विभिन्न कोर्षहरुमा समेत उत्कृष्ट रहँदै आएका छन् ।

गैरेले सशस्त्र सेवाका अलावा नेपाली सांगीतिक क्षेत्रमा उत्कृष्ट सिर्जनाहरु पस्कँदै आएका छन् । सम्मानितपछि डिएसपी एवं संगीतकार गैरेले ‘बग्दै जाँदा तीर्थ फेला पर्छ भन्थे–साँच्चै रहेछ’ भनी हार्दिक कृतज्ञता एवं खुसी व्यक्त गरेका छन् ।सांगीतिक क्षेत्रमा उनी ‘गैरे सुरेश’ नामले चिनिन्छन् ।

२४ औं सशस्त्र प्रहरी दिवस अवसरमा दुई दिनसम्म विशेष कार्यक्रम आयोजना गरिएको छ । दिवसको मूल कार्यक्रम बुधबार हुनेछ ।