पोखराको कर्मचारी विवाद बल्झियो : नगर सभा अवरुद्ध, कार्यालयमा ताला

आदर्श समाज सम्वाददाता
माघ ८, २०८१
pokhara metro

पोखरा । पोखरा महानगरपालिकामा करार कर्मचारी विवाद उत्कर्षमा पुगेको छ । करार कर्मचारी हटाउने वा नहटाउने विषयमा प्रमुख राजनीतिक दलहरु नेपाली काँग्रेस र नेकपा एमालेको मत बाझिएको छ । काँग्रेस जुनसुकै हालतमा करार कर्मचारी हटाउनुपर्ने अडानमा छ भने एमाले नहटाउने पक्षमा छ । करार कर्मचारी विवादकै कारण एमालेले विशेष नगर सभासमेत माग ग¥यो । विशेष सभा बस्यो पनि ।

लामो समयको वार्ता र संवादपछि करार कर्मचारी हटाउन एमाले पनि सहमत भयो । त्यसपछि महानगरपालिकाको संगठन तथा व्यवस्थापन सर्वेक्षण गरिएको छ ।

केही समय शान्त बनेको कर्मचारी समस्या फेरि बल्झिएको छ । कर्मचारी खटनपटनलगायत कारण देखाएर नेकपा (एमाले) ले सोमबार बसेको नगर सभाको बैठक बहिस्कार गरेको छ । सोमबार सभा सुरु हुनासाथ एमालेका जनप्रतिनिधिले नाराबाजी गर्दै बहिष्कार गरेपछि मेयर धनराज आचार्यले नगर सभा सवा ४ बजेसम्मका लागि स्थगित गरे । त्यसपछि पनि एमाले सभामा उपस्थित भएन । आचार्यले माघ १० गतेसम्मका लागि अधिवेशन स्थगित गरिदिए । करार र काज कर्मचारी हटाउँदा विभेद गरेको आरोप एमालेको छ । यस्तै, यसअघि बसेको विशेष नगर सभाका निर्णयहरु कार्यान्वयन नभएको आरोप पनि लगाएको छ ।

एमाले दलका नेता राधिका शाही कर्मचारीमा विभेद गरिएको र नगर सभाको निर्णय कार्यान्वयन नभएकोले अवरोध गरिएको बताउँछिन् । ‘विशेष नगर सभामा भएको निर्णय पालना भएको देखिएन ।

कार्यविधि बनाएर नियमित नगर सभामा पेश गर्ने भनेको थियो, त्यो पनि आएन । लिखित प्रतिवेदन आउनुपर्छ भन्ने माग साथीहरुको हो,’ उनले भनिन्, ‘विशेष नगर सभामा भएका ८ वटा निर्णयहरु अक्षरशः पालना हुनुपर्छ, किन भएन ? काज र करार केही चिठी बनाएको, केही नहटाएको छ । कर्मचारीमा विभेदकारी नीति भयो । कि सबैलाई हटाउनुपर्छ, कि सबैलाई राख्नुपर्छ भन्ने माग हो ।’ उनले भ्रमण निर्देशिका बनाएर नियमित सभामा पेस गर्ने भनिए पनि आउन नसकेकोमा गुनासो गरिन् ।

करारका कर्मचारी हटाउने विषय पनि सबैलाई लागु नभएको, कर्मचारी र जनप्रतिनिधि विदेश भ्रमणसम्बन्धी कार्यविधि नल्याएको, कुल बजेटको २५ प्रतिशत रकमान्तर गर्न खोजेको तर शीर्षक उल्लेख नभएको जस्ता गुनासा एमालेको छ । काँग्रेसले सुरुदेखि नै बहुमत पुगेपछि बैठक स्थगित गर्न नहुने बताउँदै आएको थियो । उनीहरूले १ सय ५१ जना जनप्रतिनिधिले हस्ताक्षर गरेकाले नगर सभाको एजेण्डा पेस गर्न मेयर आचार्यलाई आग्रह गरेका थिए । एमालेले बहिष्कार गरेर सभा स्थगितपछि काँग्रेसले भने महानगरपालिकामा ताला लगाएको छ ।

सभा चलाउन आवश्यक गणपुरक संख्या पुगे पनि मेयर आचार्यले अनायाश सभा स्थगित गरेको आरोप काँग्रेसको छ । नेपाली काँग्रेसका सचिव तथा वडा ४ का अध्यक्ष देवकृष्ण पराजुली बहुमत उपस्थितिमा पनि नगर सभा स्थगित गर्नु कानूनविपरीत भएको बताउँछन् । ‘बहुमत भएपछि सभा चलाउनुपर्छ । मेयर’सावले सुरुमा स्थगित गरे पनि पछिल्लो बैठक चलाउनुपथ्र्यो,’ उनले भने, ‘बैठक चलाउने भनेर सुरु भएको तर एक्कासि स्थगित गर्नुभयो । यो गलत हो । त्यसको विरोधमा काँग्रेसले उहाँहरुको कार्यकक्षमा ताला लगायो ।’

पोखरा महानगरको कार्यपालिकामा काँग्रेसको बहुमत छ भने नगर सभामा एमालेको बहुमत छ । नगर सभामा एमालेबाट ८६ जना जनप्रतिनिधि छन् भने नेपाली कांग्रेसका ८१ जना जनप्रतिनिधि छन् ।

मेयर आचार्य एक जनामात्र नेकपा एकीकृत समाजवादीका हुन् । सोमबार बसेको नगर सभामा भवन नियमित तथा अभिलेख कार्यविधिको पहिलो संशोधन, आर्थिक ऐनको पहिलो संशोधन, पूर्वाधार तथा भवन निर्माण मापदण्डको पहिलो संशोधन र महानगरको शिशुवा अस्पतालको संगठन तथा व्यवस्थापन ओएनएम सर्वेक्षण प्रतिवेदन पेस गर्ने कार्यसूची थियो ।

एजेण्डा प्रस्तुत गर्नुअघि नै एमाले बाहिरिएपछि सभा स्थगित भएको हो । ‘यो नियमित सभा हो । दुई वटा विधेयक र दुई वटा कार्यविधि मात्रै कार्यसूची थियो । १ घण्टामै सभा सकिन्थ्यो,’ उनले भने, ‘एक्कासि सभाको विधि र मर्यादा बाहिर गयो । बहुमत संख्याले बहिष्कार गरेपछि सहमतिमै जानुपर्छ भनेर स्थगित गरिएको हो ।’ उनले सभामा एमालेले आफ्ना एजेण्डा नराखेको बताए । ‘कुरा के हो भनेर स्पष्टसँग राखेको भए त्यहीँभित्र सकिन्थ्यो । जवाफ दिने थिएँ । कार्यान्वयन सबै हुन्छ भन्थें । कुरै नबुझिकन निस्किनुभयो,’ उनले भने । काँग्रेसले गरेको तालाबन्दीमा भने आचार्यले सरकारलाई ताला लगाउनु अर्को अस्वाभाविक घटना भएको प्रतिक्रिया दिए । ‘सरकारलाई ताला लगाउन पाइँदैन । आफैँले बुझ्नुपर्ने कुरा हो । सभामुखले संसद् स्थगित गरेको कुरामा प्रधानमन्त्री कार्यालयमा ताला लगाउनु उचित होइन,’ उनले भने ।

Related News

सम्बन्धित समाचार

hero news full width