लमजुङ । मस्र्याङ्दी गाउँपालिका–६ मा आयोजित वडाध्यक्ष कप फुटबल प्रतियोगिताको उपाधि सिर्जना युवा क्लब, ठूलीबेंसीले जितेको छ । फाइनलमा पुगेका सिर्जना युवा क्लब ए र वि बीच समझदारीमा विजेता घोषणा गरिएको हो ।

सेमिफाइनलबाट एउटै क्लबको दुई टिम फाइनलमा पुगेपछि प्रतिस्पर्धाबिनै सिर्जना ए लाई विजेता र बि टिमलाई उपविजेता घोषणा गरिएको आयोजक क्लब अध्यक्ष वेदराज अधिकारीले बताए ।

प्रथमले ३० र दोस्रोले २० हजार साथमा शिल्ड, मेडल र प्रमाणपत्र प्राप्त गरे ।

सिर्जना युवा क्लबका विकास थापाले सर्वाधिक गोलकर्ता र महेश अधिकारीले उत्कृष्ट खेलाडीको उपाधि पाएका छन् । विजयी टिम तथा खेलाडीलाई वडा अध्यक्ष मीनराशि गुरुङ, युवा सञ्जालका अध्यक्ष मनोज गुरुङले संयुक्त रुपमा पुरस्कार वितरण गरे ।

खेलको माध्यमबाट स्थानीय युवालाई एकीकृत गर्ने उद्देश्यले युवा सञ्जाल मस्र्याङ्दी गाउँपालिका–६, बाहुनडाँडाले वडा कार्यालयको सहयोगमा वडा अध्यक्ष कप आयोजना गरेको हो । दुईदिनसम्म सञ्चालन भएको सो प्रतियोगितामा वडा ६ भित्रका स्थानीय टोल, क्लब गरी ११ टिमले भाग लिएका थिए ।