पोखरा । नेपाल रेडक्रस सोसाइटी हेमजा उपशाखा आयोजनामा भएको निबन्ध लेखन प्रतियोगितामा ज्ञानसागर एकेडेमीकी नीकिता भण्डारी प्रथम भएकी छन् ।

विद्यालयस्तरीय (कक्षा ९–१२) उक्त प्रतियोगितामा गौरीशंकर क्याम्पसका सिर्जन छन्त्याल द्वितीय, हेमजा आवासीयकी आयुष्मा परियार तृतीय भए । स्नो भ्यू बोर्डिङकी अनुपा पौडेल र गौरीशंकर माविकी शर्मिला सुनार सान्त्वना भए ।

विष्णुपादुका माविबाट निशा तामाङ, धवलागिरी बोर्डिङबाट अनुजा पौडेल तथा अम्बिका माविकी असिमा सुनार विद्यालय प्रथम भएको उपशाखा कोषाध्यक्ष श्यामबहादुर कुँवरले जानकारी दिए । उनीहरुले क्रमशः ३ हजार, २ हजार, १ हजार तथा पाँच सय नगद पुरस्कार प्राप्त गरे ।

त्यस्तै, विद्यालय प्रथमलाई पनि जनही ५ सय रुपैयाँ पुरस्कार दिइयो ।

उपशाखाले रेडक्रसमा युवाको भूमिका, सामाजिक सञ्जाल प्रयोगका फाइदा तथा वेफाइदा एवम् युवा पलाइनबाट राष्ट्रलाई परेको असर विषयक प्रतियोगिता गरेको हो । प्रतियोगितामा हेमजाका ८ विद्यालयका ८० विद्यार्थीले भाग लिएका थिए ।

यसैबीच, हेमजा उपशाखाले शनिबार रेडक्रस अभिमुखीकरण एवम् नेतृत्व विकास प्रशिक्षण दिएको छ ।

रेडक्रसबारे अभिमुखीकरण गर्दै सहजकर्ता नवराज भण्डारीले रेडक्रस स्वयंसेवी संस्था भएको उल्लेख गर्दै रेडक्रस भावना आम जनमानसमा पुर्‍याउनुपर्ने औंल्याए ।

साइवर अपराधबारे प्रहरी सहायक निरीक्षक रवि आचार्य तथा नेतृत्व विकासबारे समाजसेवी भीमप्रसाद श्रेष्ठले प्रशिक्षण दिए ।

कार्यक्रममा रेडक्रस कास्की सभापति डण्डराज शर्मा, जिल्ला सदस्य खगेन्द्रराज पराजुली, तमबहादुर रोका, निलकण्ठ आचार्य, माधवराज बास्तोला, छन्दमणि त्रिपाठी लगायतले पनि धारणा राखे ।

उपशाखा सभापति नेत्रपाणि भण्डारीको अध्यक्षतामा भएको उक्त कार्यक्रममा उपसभापति टेकमाया आचार्यले स्वागत, मीनबहादुर पराजुली थापाले सात सिद्धान्त वाचन एवं सचिव रमा त्रिपाठीले संचालन गरिन् ।

उक्त कार्यक्रम वडा कार्यालयको सहयोगमा भएको हो ।