पोखरा । गण्डकी प्रज्ञा–प्रतिष्ठानले पोखरा सांगीतिक कलाकार संघको सहकार्यमा शनिबार मौलिक लोकभाकाको प्रस्तुति ‘गण्डकीका धुनहरू (अर्केष्ट्रा)’ संचालन गर्दैछ ।

बिहीबार पत्रकार सम्मेलनमा कुलपति सूर्य खड्का ‘बिखर्ची’ले काठमाडौँ र गण्डकीका वाद्यवादकहरू सम्मिलित सो कार्यक्रम ऐतिहासिक हुने बताए ।

उनका अनुसार नेपाली मौलिक बाजाहरूबाट निस्कने धुनको शक्ति प्रत्यक्ष अनुभूत गर्न पाइनेछ ।

राष्ट्रिय एकता दिवसको सन्दर्भमा २७ पुसमा भानु हलमा ४० कलाकारको सामूहिक प्रस्तुति रहने गरी कार्यक्रम गर्न लागिएको प्रतिष्ठान सदस्यसचिव मनकुमार श्रेष्ठले जानकारी दिए । धुनहरूमार्फत कीर्तिशेष स्रष्टाप्रति सम्मान व्यक्त गर्दै नयाँ पुस्तालाई मौलिक बाजाप्रति आकर्षित गराउने र साक्षात्कार गराउने उद्देश्य रहेको उनको भनाइ छ ।

कार्यक्रमका संगीत संयोजक तथा निर्देशक प्राज्ञ अशोक राईले पोखरामा अर्केष्ट्राको पहिलो स्वरुप प्रदर्शन गर्न लागिएको बताए । यो नेपाली संगीत विश्वस्तरमा परिचित गराउने प्रारम्भिक चरणको काम भएको बताए । पोखरामा यहाँका अग्रज स्रष्टाका सिर्जनालाई पहिलो प्राथमिकता दिएर प्रस्तुती राख्न लागिएको खुलाए । यसका अलावा सातै प्रदेशको प्रतिनिधिमूलक धुनहरू प्रस्तुत गरिनेछ । परम्परागत रुपमा रहेका सुर र ताल बाजालाई संयोजन गरिने छ । १८ प्रस्तुति ५८ मिनेटमा गरिने संयोजक राईले बताए ।

पूर्वदेखि पश्चिमसम्मका कलाकारले भाका र संस्कृति जान्ने मौका यो कार्यक्रमले दिने उनको विश्वास छ । लोपोन्मुख भाकालाई माथि ल्याएर विश्वस्तरमा पु¥याउन पूर्ण अर्केष्ट्राको रूप दिन राज्यले सहयोग गरे विश्वस्तरमा पु¥याउन सकिने उनले सुनाए ।

प्रतिष्ठानले आगामी १९–२६ माघसम्म पर्यटकका लागि संस्कृतिको प्रवद्र्धन गर्ने हेतुले लोपोन्मुख नाचहरूको प्रदर्शनसमेत गर्ने जनाएको छ । २६ माघमा व्याक टु–९० (कन्सर्ट) हुनेछ ।

५–९ फागुनसम्म प्रादेशिक ललितकला प्रदर्शनीसमेत हुने तयारी छ । आगामी १४ वैशाखमा प्रतिष्ठानको स्थापना दिवसमा विधागत पुरस्कार वितरण गरी प्रतिष्ठानको ४ वर्षे कार्यकालको डकुमेन्ट्री प्रस्तुत गरेर कार्यकाल पूरा गर्ने लक्ष्य राखेको छ ।

प्रतिष्ठान उपकुलपति गोरे गुरुङले सबै कार्यक्रमलाई सुन्दर बनाउन मेहनत गरिरहेको बताए । उनले यतिबेला गण्डकी प्रदेशका नृत्य तथा गीतसंगीतहरु अनुसन्धानका लागि काम भइरहेको जनाए ।

पोखरा सांगीतिक कलाकार संघ नेपालका अध्यक्ष हर्कराज गुरुङ भाइले गण्डकीका धुनहरू तथा व्याक टु–९० पोखराको पप ब्याण्ड कमब्याक गराउन भूमिका खेल्ने बताए ।