पोखरा । पूर्व गृहमन्त्री एवं राष्ट्रिय स्वतन्त्र पार्टीका सभापति रवि लामिछानेसमेत ७ जना प्रतिवादीलाई कास्की जिल्ला अदालतले धरौटीमा रिहा गर्ने आदेश दिएको छ ।

बिहीबार लामिछानेसहितका प्रतिवादीलाई धरौटीमा रिहा गर्ने आदेश दिएसँगै करिब ८४ दिन लामो हिरासत बसाइँपछि लामिछाने थुनामुक्त भएका छन् । उनलाई परिवारको जिम्मा लगाइएको छ ।

बिहीबार न्यायाधीश नीतिज राईको इजलासले प्रतिवादीहरुमध्ये लामिछानेसँग ६५ लाख, पूर्व डिआईजी छविलाल जोशीसँग ८८ लाख, लीला पछाईसँग ३७ लाख, रामबहादुर खनालसँग १५ लाख, आरती गुरूङसँग ५ लाख, मीना गुरूङसँग ५ लाख र कृष्णबहादुर गुरूङसँग १ लाख रुपैयाँ धरौटी माग गर्दै रिहा गर्ने आदेश गरेको हो ।

स्रेस्तेदार राजन खनालले भने, ‘यो थुनछेक आदेश मात्र हो । मुद्दा टुंगिएको होइन । अदालतले अब मुद्दा अघि बढाउँदा प्रमाण बुझ्ने तथा साक्षीहरूको बकपत्रलगायत काम गर्नेछ । आदेशमा चित्त नबुझे सरकारी पक्षलाई पुनः पुनरावेदन गर्न पाउने हकदैया हुने कानूनी व्यवस्था छ ।’

७ प्रतिवादीमध्ये लीला पछाईको हकमा माग गरिएको ३७ लाख धरौटी बुझाउन बाँकी छ । उनी थुनामुक्त भइसकेकी छैनन् । अरुले धरौटी बुझाएपछि रिहा भइसकेका छन् ।

पोखराको सूर्यदर्शन सहकारी ठगी, संगठित अपराध र सम्पत्ति शुद्धीकरणसमेतका मुद्दामा ६३ जनालाई प्रतिवादी बनाएर कास्की अदालतमा अभियोगपत्र दायर भएको थियो ।