पोखरा । पोखरा विश्वविद्यालयको प्राज्ञिक भवन कम्प्लेक्सभित्र निर्माण गरिने नयाँ अत्याधुनिक शैक्षिक भवनको सोमबार शिलान्यास भयो । पोखरा विश्वविद्यालयका नवनियुक्त उपकुलपति प्राडा वेदराज केसीले रजिष्ट्रार प्राडा दीपकबहादुर भण्डारीको उपस्थितिमा भवनको शिलान्यास गरेका हुन् ।

कार्यक्रममा विश्वविद्यालयका पदाधिकारी, शिक्षक र कर्मचारीहरूको सहभागिता थियो ।

नयाँ शैक्षिक भवन प्राज्ञिक भवन कम्प्लेक्सको पश्चिमपट्टि, स्कूल अफ इन्जिनियरिङ र स्कूल अफ डेभलपमेन्ट एण्ड सोसल इन्जिनियरिङको दक्षिणपट्टि रहेको स्थानमा निर्माण हुँदैछ । निर्माणको जिम्मेवारी श्रेष्ठ एण्ड सन्स, चो रोल्पा जेभी, काठमाडौंले पाएको छ भने सुपरभिजन पेस कन्सल्टेन्ट, काठमाडौंले गर्नेछ ।

गत १५ साउनदेखि सुरु भएको परियोजना ३० महिनाभित्र सम्पन्न गर्ने लक्ष्य छ । ४१ करोड ४३ लाख १७ हजार ५ सय ५९ रुपैयाँ लागतमा निर्माण हुने यो भवनसँगै स्कूल अफ हेल्थ एण्ड एलाइड साइन्सेजका लागि ट्रस संरचना, स्कूल अफ बिजनेसका लागि शौचालय निर्माण र पुरानो प्रशासनिक भवनको मर्मत कार्य पनि अघि बढाइने छ ।

नयाँ शैक्षिक भवन भुइँतलादेखि ७ तलासम्म निर्माण हुनेछ । भवनमा २६ वटा कक्षा कोठा, १२ प्रशासनिक कोठा, २४ शिक्षकका कोठा र ४ वटा विभागीय प्रमुखका कोठा हुनेछन् । यसबाहेक, प्राथमिक उपचार कक्ष, चौकीदार कक्ष, प्यान्ट्री, बिजुली कोठा र ४ वटा भण्डार कोठाहरू पनि रहने छन् । भवनमा दुईवटा भ¥याङ र एउटा लिफ्टसहित ३ सय जना क्षमताको अडिटोरियम हल र ४० जना क्षमताको मिनी हलको व्यवस्था हुनेछ । भवन परिसरमा १९ वटा कार र १ सय २० वटा मोटरसाइकल पार्किङ सुविधा उपलब्ध गराइनेछ ।

निर्माण व्यवसायीले भवनलाई पर्दा, कार्पेट र फर्निचरसहित सुसज्जित गरी विश्वविद्यालयलाई हस्तान्तरण गर्नेछ ।

सो अवसरमा निवर्तमान उपकुलपति प्राडा प्रेमनारायण अर्यालले शुभकामना सन्देश दिँदै पोखरा विश्वविद्यालयमा नयाँ शैक्षिक भवन शिलान्यास भएकोमा खुशी व्यक्त गरे ।

भवनले विश्वविद्यालयको शैक्षिक तथा प्रशासनिक कार्यलाई थप व्यवस्थित बनाउँदै गुणस्तरीय शिक्षामा उल्लेखनीय योगदान पु¥याउने विश्वास गरिएको विश्वविद्यालयका सूचना अधिकारी लोकप्रसाद ढकालले जनाए ।