पोखरा । गण्डकी प्रदेश तेक्वान्दो संघको वार्षिक साधारणसभा सम्पन्न भएको छ । सभाको उद्घाटन गर्दै प्रदेश खेलकुद परिषद गण्डकीका सदस्यसचिव श्रीधर शर्माले खेल संघहरुले निर्धारित मिति २० पुसभित्र दर्ता, नवीकरण, अध्यावधिक र साधारण सभा नगरेको पाइए कारबाही गर्ने चेतावनी दिए ।

उनले समयभित्र दर्ता, नवीकरण, अद्यावधिक र साधारण सभा नगर्ने संघका प्रतिनिधिहरुले खेल संघको लेटर प्याड तथा छापसमेत प्रयोग गर्न नपाउने जनाए । करिब २८ वटा खेल संघहरु प्रदेशमा आबद्ध भएको उनले जानकारी दिए ।

नेपाल तेक्वान्दो संघका उपाध्यक्ष हरिश्वर पोख्रेलले तेक्वान्दो खेलको विकासका लागि डोजाङहरुको स्थापना हुनुपर्नेमा जोड दिए । स्वस्थ नागरिक उत्पादनसँगै घरघरमा तेक्वान्दो पु¥याउन डोजाङहरुको स्थापना आवश्यक रहेको उनको भनाइ थियो ।

गण्डकी प्रदेश तेक्वान्दो संघका अध्यक्ष जगनबहादुर गुरुङको अध्यक्षतामा भएको कार्यक्रममा संघका उपाध्यक्ष लक्ष्मी पाण्डे, महासचिव रमेश पौडेल, कोषाध्यक्ष माइकल कर्माचार्यले बोलेका थिए ।

कोषाध्यक्ष कर्माचार्यले आर्थिक वर्ष २०८०÷०८१ मा आम्दानीतर्फ २९ लाख ६२ हजार ९ सय २८ र खर्चतर्फ २५ लाख २३ हजार ८ सय ६४ रहेको जानकारी दिए । बाँकी ४ लाख ३९ हजार यस वर्ष भुक्तानी गर्न बाँकी रहेको र सेवा प्रदायकहरुलाई भुक्तानी गरिने बताए । संघ अध्यक्ष गुरूङले पोखरा रंगशालामा निर्माण हुन लागेको तेक्वान्दो प्रशिक्षण हल निर्माण सम्पन्न गर्न सबैको सहयोगको अपेक्षा गरे ।