पोखरा । यस वर्षको श्रीपती सामाजिक पत्रकारिता पुरस्कारबाट वरिष्ठ पत्रकार नारायण कार्की सम्मानित भएका छन् ।

शनिबार पोखरामा आयोजित समारोहमा श्रीपती कोइराला गुठीद्वारा सञ्चालित उक्त पुरस्कारबाट कार्कीलाई सम्मान गरिएको हो । उनलाई नगद २२ हजार २२२ रुपैयाँसहित दोसल्ला र सम्मानपत्र हस्तान्तरण गरिएको हाे।

पोखरा न्यूरोड निवासी कार्कीले पत्रकारिता माध्यमबाट सामाजिक सेवामा पुर्‍याएको योगदानको कदर स्वरुप उक्त पुरस्कार दिइएको गुठीले जनाएको छ ।

२०२९ सालमा राससबाट पत्रकारिता सुरु गरेका उनी हाल बिबिसी नेपाली सेवा गण्डकी प्रदेश ब्यूरो प्रमुखरुपमा कार्यरत छन् ।

यसअघि, सो पुरस्कार आदर्श समाज दैनिकका प्रधानसम्पादक कृष्णप्रसाद बास्तोलालाई दिइएको थियो ।