गैंडाकोट । कविशिरोमणि लेखनाथ पौड्यालको १४१ औं जन्मजयन्ती सन्दर्भमा आयोजित वाङ्मय विमर्श एवं कविता वाचन कार्यक्रम शनिबार सम्पन्न भएको छ ।

नवलपुरका पुराना गीतकार तथा साहित्यकार दीपक सोतीको प्रमुख आतिथ्यमा भएको कार्यक्रममा कविशिरोमणि पौड्यालको व्यक्तित्व र कृतित्व विषयमा विमर्शसहित उनका विषयमा कविता प्रस्तुत गरिएको थियो ।

‘पौड्यालका विषयमा विशेष छन्द कविताको प्रवर्धनमा कविशिरोमणिको महत्वपूर्ण योगदान रहेको बताउँदै अहिलेसम्म पनि छन्द कवितामा उनका कविताहरु नै प्रभावशाली छ,’ सोतीको कथन थियो ।

गैंडाकोट नगर प्रज्ञा प्रतिष्ठान र उषाकालीन साहित्य समाज अमरापुरीको सहआयोजनामा भएको कार्यक्रममा गैंडाकोट १५ कि वडाध्यक्ष कोकीसरा रानामगर, साहित्यकार प्रेमराज तिमल्सिना, विनोद मल्ल, दशरथ तिवारी, रामहरि शर्मा सराह, इन्द्रराज पौडेल, सुशील आदर्श, कृष्णदेवी शर्मा, सदानन्द अभागी, विष्णुमाया पन्थी, भानु सापकोटा, धर्मानन्द शर्मा पौडेल, जीवनराज सापकोटा, गोविन्द कोइराला, मुना धनञ्जय, भूमिका गैरे तिमिल्सिना, लगायतले पौड्यालका विषयमा आफ्नो धारणासहित रचना प्रस्तुत गरेका थिए ।

गैंडाकोट नगर प्रज्ञा प्रतिष्ठानका सचिव भीमप्रसाद शर्माले अध्यक्षतामा भएको कार्यक्रममा उषाकालीन साहित्य समाजका अध्यक्ष तेजेन्द्र सापकोटाले स्वागत मन्तव्य र समाजकी सचिव राधा पाण्डेले संचालन गरेकी थिइन् ।