पोखरा । पोखरा–१ पुरानो टुँडिखेलमा रहेको राष्ट्रिय माविको प्रशासनिक भवन शिलान्यास गरिएको छ ।

प्रतिनिधिसभा सदस्य दामोदर बैरागीले भवन शिलान्यास गर्दै भवन निर्माणपश्चात् त्यसमा लाग्ने अन्य पूर्वाधारका लागि आफूले थप पहल गर्ने प्रतिबद्धता जनाए ।

राष्ट्रिय मावि यस क्षेत्रका शैक्षिक धरोहर रहेको चर्चा गरेका उनले विद्यालयको सवाङ्गीण विकासका लागि सबैजना लाग्नुपर्ने बताए ।

कार्यक्रममा गण्डकी प्रदेशसभा सदस्य राजकुमारी भुजेल, पोखरा १ का वडाध्यक्ष सहारा प्रधान, विद्यालय व्यवस्थापन समिति अध्यक्ष रामविक्रम राणा र सहायक प्रधानाध्यापक नारायणप्रसाद चापगाईंलगायतले भवन निर्माणमा सांसद बैरागीले पहल गरेकोमा उनीप्रति आभार प्रकट गरे ।

उक्त भवन नेपाल सरकार सहरी विकास मन्त्रालय, सहरी विकास तथा भवन निर्माण विभाग अन्तर्गत रहेको संघीय आयोजना कार्यान्वयन इकाइ कास्कीको एक कारोडको लागतमा निर्माण हुन लागेको हो । आफन्त कन्ट्रक्सन प्रालिले निर्माणको जिम्मा पाएको भवन चालु आवभित्र बनिसक्ने लक्ष्य छ ।