पोखरा । नेपाली काँग्रेस कास्कीको एक सयदिने विशेष अभियानअन्तर्गत मादीको सिक्लेसमा अन्तरक्रिया गरिएको छ । जिल्ला सहसचिव एवं प्रवक्ता नवीन सिग्देलका मादी गाउँपालिका अन्तर्गतको कार्यक्रम सिक्लेसमा गरिएको हो ।

सिक्लेसमा मादी गाउँपालिकाको आर्थिक विकासमा कृषि पर्यटनको सम्भावना र चुनौती विषयक अन्तरक्रिया कार्यक्रम गरिएको काँग्रेसले जनाएको छ । कार्यक्रममा नेपाली काँग्रेसका केन्द्रीय सदस्य गोविन्द भट्टराईले काँग्रेसले देशको सबै क्षेत्रको नेतृत्व गरेको बताए । उनले देशमा भ्रमको राजनीति हावी हुन थालेको भन्दै भ्रमलाई चिर्दै काँग्रेस अघि बढ्नुपर्नेमा जोड दिए ।

नेपाली काँग्रेस कास्कीका सभापति किशोरदत्त बरालले जनताको आवश्यकता नै काँग्रेसको एजेण्डा हुनुपर्ने उल्लेख गरे । त्यस अवसरमा पर्यटन व्यवसायी पशुपति शर्माले मादीको कृषि पर्यटनको सम्भावना र चुनौतीका विषयमा प्रशिक्षण दिएका थिए । कास्की काँग्रेसका पूर्व सभापति यज्ञबहादुर थापा, महासमिति सदस्य दिपक गुरुङ (माइला), महाधिवेशन प्रतिनिधि गीमाया गुरुङ, नरेन थापा, काँग्रेस कास्कीका जिल्ला सदस्य विकास थापा, क्षेत्र नम्बर १ का सचिव ओमप्रकाश गुरुङ लगायतले बोलेका थिए ।

काँग्रेस मादी गाउँपालिकाका सभापति यामबहादुर गुरुङको अध्यक्षतामा भएको कार्यक्रममा वडा १ का सभापति टंकप्रसाद गुरुङले स्वागत र वडा ४ सभापति यमनाथ सापकोटाले संचालन गरेका थिए । अब पुस १९ गते आज रुपा र पुस २६ गते पोखरामा अभियानका कार्यक्रमहरु संचालन हुनेछन् ।