पोखरा । २४ औं आहारारा पोखरा गोल्ड कप फुटबल प्रतियोगिता–२०८१ का लागि चरक मेमोरियल हस्पिटल सहउप–प्रायोजक रुपमा जोडिएको छ ।

पोखरा–८, नागढुंगास्थित उक्त हस्पतालका प्रबन्ध निर्देशक कपिल पोखरेल र प्रतियोगिता आयोजक सहारा क्लब पोखराका अध्यक्ष केशवराज बरालबीच सहमतिपत्रमा हस्ताक्षर भयो । सो अवसरमा क्लबका पूर्व अध्यक्ष विक्रम थकाली, वरिष्ठ उपाध्यक्ष एवं प्रतियोगिता संयोजक पूर्णबहादुर गुरुङसहित अस्पतालका प्रतिनिधि उपस्थित थिए ।

मोफसलको चर्चित क्लब सहारा क्लबले आगामी २२ माघदेखि ३ फागुनसम्म पोखरा रंगशालामा उक्त प्रतियोगिता संचालन गर्दैछ । नेपालको फुटबल इतिहासमा निरन्तर सञ्चालित एकमात्र प्रतियोगिता आहा रारा गोल्डकप हो ।

प्रतियोगिता सफल पार्न विभिन्न सहयोगीहरु जोडिने क्रम जारी छ । यसैक्रममा चरक मेमोरियल अस्पताल सहउप–प्रायोजकरुपमा जोडिएको प्रतियोगिता संयोजक पूर्णबहादुर गुरुङले जानकारी दिए । उनका अनुसार चरकले फुटबल हेर्ने दर्शकको निःशुल्क फुल बडी चेक अपसम्मको सुविधा दिनेछ । दैनिक २ जना भाग्यमानी दर्शकलाई सो सुविधा मिल्नेछ ।

त्यसबाहेक अस्पतालले क्लबलाई डेढ लाख रुपैयाँ प्रदान गर्नेछ । चरकले गत वर्ष पनि प्रायोजनमा सम्झौता गरेको थियो ।

क्लबले पोखरा १७, दोबिल्लामा सूर्यबहादुर केसी स्मृति सहारा फुटबल एकेडेमी संचालन गरेको छ । हाल चौथो ब्याजको रुपमा एकेडेमीमा आश्रित कठिन परिस्थिति र विपन्न वर्गका ३० जना बालकहरु रहेको क्लब महासचिव रामजीप्रसाद अधिकारीले जताए ।

फुटबल प्रतियोगिताबाट हुने आम्दानी एकेडेमीमा आश्रित बालिकहरुको उचित शिक्षादीक्षा, आवास र दैनिक फुटबल प्रशिक्षणमा क्लबले खर्च गर्दै आएको क्लब अध्यक्ष बरालले बताए ।

प्रतियोगिताको मुख्य प्रायोजक हिमश्री फुड्स प्रालिको उत्पादन आहा तथा रारा चाउचाउ हो ।

गत वर्षको विजेता त्रिभुवन आर्मी फुटबल क्लब र उपविजेता थ्री स्टार क्लब ललितपुर हुन् । विजेताले १२ लाख र उपविजेताले ६ लाखसहित शिल्ड, मेडल र प्रमाणपत्र पुरस्कार प्राप्त गरेका थिए ।