लमजुङ । लमजुङ सदरमुकाम बेसींसहरबाट १४ वर्षीया किशोरीलाई भारततर्फ बिक्री गर्न लागेको अभियोगमा प्रहरीले ३ जनालाई पक्राउ गरेको छ । पक्राउ परेका उनीहरूलाई जिल्ला प्रहरी कार्यालय, लमजुङले बुधबार पत्रकार गरी सार्वजनिक गरेको हो ।

पक्राउ पर्नेमा भारतको मोतिहारी घोडासान थाना बकुलिया–५ घर भई हाल बेसीसहर नगरपालिका–७ बस्ने ४० वर्षीय सेख सइतुलासमेत छन् ।

जिल्ला प्रहरी कार्यालयका प्रमुख प्रहरी नायव उपरीक्षक निसान्त श्रीबास्तवले भने, ‘उनीहरूले ती पीडित किशोरी श्रीकला (नाम परिवर्तित) लाई ललाइफकाइ गर्दै अपहरण गरी लगेका रहेछन् । ती किशोरी गत मंसिर २४ गतेदेखि हराएकी थिइन् । उनलाई आफन्तजनले खोजी गर्नेक्रममा ३ दिन अगाडि फेला परेकी हुन् । पीडितको किटानी दायरी परेपछि सो अभियोगमा ३ जनालाई पक्राउ गरी अनुसन्धान थालिएको हो ।’

ती किशोरीलाई बेसीसहर–७ बस्ने सेख सइतुला समेतका ३ जनाले अपहरण गरी लगेको पुष्टि हुन आएको प्रहरी भनाइ छ । उनीहरूलाई अपहरण तथा शरीर बन्धकसम्बन्धी कसूरमा लमजुङ जिल्ला अदालतबाट बुधबार ५ दिनको म्याद थप भएको छ ।

घटनाको थप अनुसन्धान भइरहेको जिल्ला प्रहरी कार्यालयले जनाएको छ ।