पोखरा । भारतका पूर्व प्रधानमन्त्री मनमोहन सिंहको निधन भएको छ । उनको बिहीबार राति ९ बजेर ५१ मिनेटमा दिल्लीको एम्स अस्पतालमा उपचारका क्रममा निधन भएको हो । अस्पतालले विज्ञप्ति जारी गरेर निधनको पुष्टि गरेको हो । उनी ९२ वर्षका थिए ।

स्वास्थ्यमा समस्या आएपछि उनलाई बिहीबार मात्रै अस्पताल भर्ना गरिएको थियो ।

अस्पताल मेडिकल बुटेलिनका अनुसार ‘पूर्वप्रधानमन्त्री डा. मनमोहन सिंहको ९२ वर्षको उमेरमा निधन भएको जानकारी गराउँदछौं । उहाँ उमेरसँग सम्बन्धित स्वास्थ्य अवस्थाको लागि उपचार गरिरहनुभएको थियो र बिहीबार घरमा अचानक बेहोस हुनुभएको थियो । बेलुकी ८ बजेर ६ मिनेटमा एम्समा मेडिकल इमर्जेन्सीमा ल्याइएकोमा सबै प्रयासका बाबजुद राति नौ बजेर ५१ मिनेटमा मृत घोषणा गरियो ।’

कांग्रेसका दिग्गज नेतासमेत रहेका सिंहले सन् २००४ देखि २०१४ सम्म भारतको प्रधानमन्त्रीको पद सम्हालेका थिए ।