पोखरा । सेन्चुरी युवा क्लबले यही ११–१४ पुससम्म ‘२३ औं सेन्चुरी ल्होसार मेला’ आयोजना गर्ने भएको छ ।

तमु समुदायको महान् पर्व ल्होसार/ल्होछारको अवसरमा मेला आयोजना गरिने क्लबका वरिष्ठ सल्लाहकार राजकुमार गुरुङले जानकारी दिए । उनले संस्कृतिको संरक्षण, खेल तथा पर्यटनको प्रवद्र्धन गर्ने उद्देश्यसहित विगत लामो समयदेखि ल्होसार मेला सञ्चालन गर्दै आएको बताए । ‘हामीले विगत लामो समयदेखि ल्होसार मेला गर्दै आएका छौं,’ उनले भने, ‘यो वर्षपनि पुषको ११ गतेदेखि मेला राखेका छौं । यसले खेलकुदको विकाससँगै पर्यटन प्रवद्र्धनमा टेवा पुग्ने विश्वास लिएका छौं ।’

मेलाको मुख्य आकर्षणमा भलिबल प्रतियोगिता, बास्केटबल प्रतियोगिता छन् ।

पुरुष भलिबल तथा बास्केटबल दुवैतर्फ विजेतालाई ८० हजार नगदसहित ट्रफी, मेडल र प्रमाणपत्र प्रदान गरिने छ । दोस्रो र तेस्रो हुने टिमले क्रमशः ५० हजार र २५ हजारसहित ट्रफी, मेडल र प्रमाणपत्र प्राप्त गर्नेछन् । दुवै खेलमा टिम सहभागिता जनाउन दर्ता शुल्क ५ हजार निर्धारण गरिएको छ ।

मेलालाई थप आकर्षक बनाउन विभिन्न सांस्कृतिक कार्यक्रमसमेत हुने आयोजकले जनाएको छ ।