पोखरा । राष्ट्रिय स्वतन्त्र पार्टी (रास्वपा) का सभापति एवम् पूर्वउपप्रधानमन्त्री रवि लामिछानेलाई कास्की प्रहरीले तीनवटा कसुरमा मुद्दा चलाउन सिफारिस गरेको छ ।

उनलाई सहकारी ठगी, संगठित अपराध र सम्पत्ति शुद्धीकरणसँग सम्बन्धित अभियोगमा मुद्दा चलाउन मागसहित अनुसन्धान प्रतिवेदन जिल्ला सरकारी वकिल कार्यालयमा बुझाइएको छ ।

कास्की प्रहरीका प्रवक्ता डिएसपी वसन्तकुमार शर्माले ती मुद्दामा सजाय हुनुपर्ने मागसहितको प्रतिवेदन सोमबार सरकारी वकिल कार्यालयलाई बुझाएको जानकारी दिए । उनले भने, ‘अनुसन्धान प्रतिवेदनका साथै विभिन्न निकायबाट प्राप्त अनुसन्धानलाई सघाउने दस्तावेज पनि सरकारी वकिल कार्यालयमा बुझाएका छौँ ।’

पक्राउ परेको दुई महिनापछि रविमाथि अनुसन्धान सकिएको हो । सभापति लामिछाने सहकारीको रकम अपचलन गरेको आरोपमा कात्तिक २ गते काठमाडौँको वनस्थलीस्थित राष्ट्रिय स्वतन्त्र पार्टीको केन्द्रीय कार्यालयबाट पक्राउ परेका थिए । सोही दिन पोखरा लगिएका उनीसित पोखरा, भैरहवा, चितवन, पर्सा र काठमाडौँमा बयान लिएर प्रहरीले प्रतिवेदन तयार पारेको हो ।

लामिछानेमाथि कास्कीको सूर्यदर्शन सहकारी, बुटवलको सुप्रिम बचत तथा ऋण सहकारी संस्था लिमिटेड, काठमाडौँको कालिमाटीस्थित स्वर्णलक्ष्मी सहकारी, चितवनस्थित सहारा सहकारी र वीरगन्जको सानो पाइला बचत तथा ऋण सहकारी संस्थामा बचतकर्ताको रकम हिनामिना गरेको आरोप छ ।