पोखरा । मदरल्याण्ड मावि, पोखरामा शुक्रबारदेखि वार्षिक खेदकुद कार्यक्रम सुरु भएको छ । विद्यार्थीमा निहीत खेल प्रतिभा बाहिर ल्याउन आयोजित प्रतियोगिता ३ दिनसम्म चल्नेछ ।
प्राचार्य डा. नारायण बरालका अनुसार छात्रा र छात्रका भलिबल, बास्केटबल, फुटसल, टेबलटेनिस र चेस खेलाइने छ ।

विद्यार्थीले विभिन्न समूह बनाएर आन्तरिक प्रतिस्पर्धा गरिरहेका छन् । प्रतियोगितामा छात्रतर्फ फुटसलमा १६, छात्रातर्फ ४, बास्केटबलमा छात्रातर्फ ५, छात्रतर्फ ११, भलिवलमा छात्रातर्फ ५ र छात्रतर्फ १४ समूहले प्रतिस्पर्धा गर्नेछन् । त्यस्तै टेवटेनिस र चेसतर्फ व्यक्तिगत रुपमा प्रतिस्पर्धा गर्नेछन् ।

सबै विधाका खेल प्रतियोगितामा प्रथम, द्वितीय र तृतीय हुनेलाई शिल्ड, मेडल र प्रमाणपत्र दिइनेछ । उत्कृष्ट खेलाडी, सर्वाधिक गोलकर्ता, बेष्ट डिफेन्स, बेस्ट मिडफिल्ड, उत्कृष्ट खेलाडी लगायतलाई पनि शिल्ड र प्रमाणपत्र दिइने छ ।

विद्यालयले नियमित अध्ययनबाहेक विद्यार्थीमा भएको खेल क्षमता बाहिर ल्याउनका लागि तल्लो तहदेखि नै खेलकुदमा पनि उत्तिकै जोड दिएको आएको प्राचार्य बरालले जानकारी दिए । विद्यालयको आफ्नै फुटसल कोर्ट सहितका संरचनाभित्र यी खेलहरु संचालन हुनेछन् ।