लेखनाथ । सशस्त्र प्रहरी बल गण्डकी प्रदेश २५ औं संस्करणको आदर्श कप फुटबल प्रतियोगिताको फाइनलमा प्रवेश गरेको छ ।

लेखनाथको भण्डारढिकस्थित लेखनाथ रंगशालामा बिहीबार दोस्रो सेमिफाइनलमा सशस्त्र प्रहरीले गोरखा फुटबल क्लबलाई १–० ले पराजित गर्दै कास्की–११ सँग फाइनल भिडन्त सुनिश्चित गरेको हो ।

सशस्त्रका सुजन तामाङले खेलको ७१ औं मिनेटमा गरेको गोल नै जितको लागि निर्णायक बन्यो । गोरखा फुटबल क्लब खेलमा फर्किन खोजे पनि अन्तिम समयसम्म प्रयास असफल भयो । उसका केही गतिला प्रहार खेर गएका थिए ।

खेलमा सशस्त्रका गोलरक्षक अजित कुमार बिक म्यान अफ दि म्याच बने । उनले नगद ५ हजारसहित मेडल हात पारेका छन् ।

शनिबार उपाधिका लागि सशस्त्र प्रहरी बल गण्डकी र कास्की ११ भिड्ने आयोजकले जनाएको छ । कास्की–११ ले बुधबार पहिलो सेमिफाइनलमा पेनाल्टी सुट आउटमा आयोजक आदर्शलाई ४–३ ले पराजित गर्दै फाइनलमा स्थान बनाएको थियो ।

गत २२ मंसिरदेखि सुरु भएको प्रतियोगितामा कुल ८ टिमको सहभागिता थियो ।

विजेताले ४ लाख २५ हजार र उपविजेताले २ लाख २५ हजार रुपैयाँ, शिल्ड, मेडल तथा प्रमाणपत्र हात पार्नेछ । विधागततर्फ सर्वाेत्कृष्टलाई २५ हजार, ट्रफी, मेडल तथा प्रमाणपत्र प्रदान गरिने क्लब अध्यक्ष पदम गुरुङले जानकारी दिए ।

यस्तै, उत्कृष्ट प्ले मेकर, सर्वाधिक गोलकर्ता, उत्कृष्ट डिफेन्डर, उत्कृष्ट गोलरक्षक, उत्कृष्ट कोचलाई जनही १५ हजारसहित ट्रफी, मेडल तथा प्रमाणपत्रद्वारा पुरस्कृत गरिने आयोजकले जनाएको छ ।