पोखरा । शनिबारको दिन बारपाकीहरुलाई जंगलमा घाँस काट्न खुला गरिएको थियो । बिहानको खाना खाइवरी स्थानीय शम्जेर गुरुङ घाँस काट्न गाउँबाट झण्डै २ घण्टा लाग्ने बाटो हिंडेर लेकतिर लागे ।

उनकै पछि थिइन्, सूचिना घले । ९ महिनाअघि काशीगाउँबाट विवाह गरेर बारपाक पुगेकी उनी काठमाडौंबाट घर गएको बेला परिवारलाई सघाउन जंगल गएकी हुन् । अघि हिंडिरहेका शम्जेर गाउँकै आफूभन्दा अग्रज र त्यसमाथि शिक्षक भएकाले उनलाई भरोसा लागेको थियो । शम्जेर अघिअघि, उनी पछिपछि जंगल पुगे । जंगल पुगेपछि शम्जेर सूचिना नजिक पुगे । शारीरिक सम्पर्कको प्रस्ताव राखे ।

सूचिनाले उनको प्रस्ताव स्वीकारिनन् । शम्जेरले उनीमाथि जबरजस्तीको प्रयास गरे । १८ वर्षीया सूचिनाले प्रतिकार गर्न खोज्दा शम्जेरले उनकै हत्या गरी दिए । प्रहरीले ४३ वर्षका शम्जेरलाई पक्राउ गरेर मंगलबार सार्वजनिक गरेको छ ।

‘पोष्टमार्टम रिपोर्टले बलात्कार भएको पुष्टि गरेको छैन । बयानमा जबरजस्ती गर्न खोज्दा घटना भएको स्वीकारेका छन्,’ प्रहरी नायब उपरीक्षक इन्द्रप्रसाद सुवेदीले भने, ‘घटनाको प्रकृति हेर्दा पनि एकान्त देखेपछि प्रयास गरेको र प्रतिकार गर्दा हत्या भएको देखिन्छ ।’ मंसिर १५ को उक्त घटनापछि सूचिना सम्पर्कविहीन थिइन् । परिवारले खोज्दै जाँदा मंसिर १८ गते जंगलमा गाडिएको अवस्थामा फेला गरेको सुवेदीले जानकारी दिए । घटना बारपाक सुलिकोट गाउँपालिका–१ स्थित मैखर्क जंगलमा भएको हो ।

‘महिला चिच्याएपछि गोबर र माटो मुखमा कोचेको बयानमा स्वीकारेका छन् । हत्यापछि साथमा रहेको खुर्पाले खाल्डो खनेर शव पुरेको बयान दिएका छन्,’ सुवेदीले भने, ‘त्यसपछि घरमा आएर बसेका थिए । उनीमाथि शंका गरेर बयान लिँदा कुरा बाझियो । अनुसन्धानलाई अझै नजिक पु¥यायौं र घटना पुष्टि भयो ।’ उनी २२ मंसिरमा पक्राउ परेका हुन् ।

घटनास्थल कस्तो थियो ?

अनकन्टार जंगल । सूचिनाको चप्पल, हँसिया र डोको छरपस्ट थिए । अलि पर अर्को डोको । डोकोभित्र घाँस र उनीको टोपी फेला परेको प्रहरीले जनाएको छ । करिब एक सय मिटर तल निगालाको बोटमा रगत देखियो । नजिकै कम्ब्याट क्याप, लेबन्टी र कपालको गुजुल्टो फेला प¥यो । त्यसकै आधारमा खोजी गर्दा सानो खाल्डो खनेर पुरिएको थियो, सूचिनाको शव । शव उत्खनन् गर्दा उनको टाउकोमा धारिलो हतियारले काटिएको पाइयो भने दायाँ हातका औंला काटिएका थिए । शव निकाल्दा पछ्यौरी र ज्याकेट खोलिएको अवस्थामा थियो भने नाम्लोले कम्मर खुकुलो गरी बेरिएको थियो । शम्जेरले नाम्लोले बोकेर खाल्डोसम्म पुर्‍याएको साविती बयान दिएका छन् ।

१८ वर्षीया सूचिना घले ९ महिनाअघि काशीगाउँबाट विवाह गरेर बारपाक पुगेकी थिइन्

शव भेटिएपछि प्रहरीले शंकाका आधारमा भेडीगोठालाहरुसँग सोधपुछ सुरु गरेको हो । धेरैलाई निगरानी राख्दै छोड्दै गरियो । २२ मंसिरमा शम्जेरलाई पक्राउ गरियो । उनलाई सोधपुछ गर्दा घटनाको दिन शम्जेरले आफू घरमै भएको बयान दिए । तर परिवारले भने उक्त दिन उनी जंगल गएको जानकारी प्रहरीलाई दिए । प्रहरीलाई नै बयानमा ढाँटेपछि उनीमाथि शंका लागेर सोधपुछ गर्दै जाँदा पर्सिपल्ट उनले घटना घटाएको स्वीकारेका गोरखा प्रहरीले जनाएको छ । ‘आपराधिक घटना यसअघि नघटाए पनि उनी महिलासँग नजिकिन खोज्ने र चरित्रमाथि प्रश्न गर्दा रहेछन्,’ अनुसन्धानमा खटिएका एक प्रहरीले भने, ‘प्रहरीसँग बयानमा ढाँट्ने र उनको व्यवहार हेर्दा पनि शंका लागेपछि घटना पुष्टि भएको हो ।’

घटनाबारे प्रहरीले पत्रकार सम्मेलन गरेर जानकारी गराएको हो । यही घटना केन्द्रित रहेर ५० भन्दा बढी व्यक्तिहरुसँग प्रहरीले सोधपुछ गरेको थियो । शम्जेरलाई सुरुदेखि नै निगरानीमा राखेर अनुसन्धान गरिरहेको थियो । उनका गतिविधिहरु हेरेर उनीमाथि शंका बढी भएको एसपी बासु पाठकले सुनाए । ‘घटनापछि समाजमा खासै ननिस्किने, टोलाइरहने गर्दा रहेछन् । गाउँमा प्रहरीले सचेतना पनि चलायो,’ उनी भन्छन्, ‘गाउँलेहरुकै सहयोगले शम्जेर पक्राउ परेका हुन् ।’ हत्यापछि घर फर्केर उनले दुईपटकसम्म आत्महत्या प्रयास गरेको बयानका क्रममा खुलाएका छन् । उनलाई घरमा छोरी र श्रीमतीले आत्महत्याबाट जोगाएका थिए । त्यसपछि आफँै बयान नोट लेखेर औंठाछाप गरेर घरमा राखेको प्रहरीले जनाएको छ ।

‘घटना अकस्मात् भएको देखिन्छ । घटनापछि रिग्रेट फिल गरेका छन् । त्यसैले आत्महत्याकै प्रयास गरेको अनुसन्धानबाट देखिएको छ,’ उनले भने, ‘आफ्नो गल्ती नोटमा लेखेर ल्याप्चे पनि लगाएका छन् । त्यो हामीले बरामद गरेका छौं ।’ घटनाको अनुसन्धानका लागि गोरखा प्रहरीका प्रहरी नायब उपरीक्षक इन्द्रप्रसाद सुवेदीको कमाण्डमा तालिमप्राप्त कुकुरसहितको टोली खटिएको थियो । माइती पक्षले दोषी पक्राउ गर्न तारन्तर दबाब दिँदै आएका थिए । सूचिनाको शव शिक्षण अस्पताल काठमाडौंमा छ ।