पोखरा । पोखरा १५, ढुंगेसाँघु, पट्नेरीमा जारी शुक्लागण्डकी कोटिहोम–२०८१ मा सोमबार निःशुल्क व्रतबन्ध गरिएको छ । कार्यक्रममा ११ जनाको ब्रतबन्ध भएको यज्ञ आयोजक मुल समितिका अध्यक्ष एवं अन्नपूर्णेश्वर शिवालय शिवशक्ति धाम तथा बृहत्तर धार्मिक क्षेत्र विकास समितिका अध्यक्ष मदन गिरीले बताए ।

कोटिहोममा मंगलबार चौरासी पूजा र तुलादान कार्यक्रम हुने गिरीले बताए । ‘कोटिहोम संचालनको अवधिमा व्रतबन्ध, चौरासी पूजा गर्न चाहेमा निःशुल्क रुपमा पूजा गर्न सकिन्छ, कर्ताले स्वेच्छिक दान गर्न चाहेको अवस्थामा दान स्विकार गरिने छ,’ गिरीले भने ।

कोटिहोमको सातौं दिन ठूलो संख्यामा भक्तजनको उपस्थिति रहेको थियो । आयोजकको तर्फबाट भक्तजनको लागि निःशुल्क भोजनको व्यवस्थापन गरिएको यज्ञ आयोजक मूल समितिका संयोजक नारायण भण्डारीले जानकारी दिए ।

यज्ञका प्रमुख वाचक, संरक्षक तथा यज्ञ संकल्पकर्ता शोभाकान्त ढकाल (कृपालु दास) ले पर्यटकीय धार्मिक क्षेत्र बनाउने उद्देश्यसहित कोटिहोम आयोजना गरिएकोले सबै पोखरेलीको साथ र सहयोगको अपेक्षा गरिएको बताए ।

सो स्थानमा विगतमा पनि साधुसन्त महन्त सिद्धपुरुषहरुले कोटीहोम लगाएको र अहिले करिब ३१ वर्षपछि धाम निर्माण गर्ने उद्देश्यका साथ कोटीहोम आयोजना गरिएको हो । अबको ५ वर्षमा धाम विश्वको आकर्षक गन्तब्य बन्ने संकल्पकर्ता ढकालले जानकारी दिए ।

कोटिहोम २७ मंसिरसम्म सञ्चालन हुनेछ ।